Diaranzon mainta Corte den Prome Instancia a trata un caso hopi serio, cual ta e caso penal contra di tres homber adulto, Nan ta wordo sospecha di a tene relacion cu’’n mucha muhe di 13 aña na 2015.
Durante tratamento di e caso, e hombernan aki a nenga di a tene relacion sexual cu e mucha, mientras cu un di nan si a admiti.
Ta trata di e hombernan G.(39), M.(43), y V.(46). Fiscal a acusa V. di a tene relacion cu e mucha muhe, cu e tempo ey tabata tin 13 aña. Esaki lo a tuma luga entre 1 September 2015 te 31 December 2015. Segun fiscal a bisa cu e sospechoso lo a manda mensahenan pa traha un cita pa tene relacion sexual cu e mucha.
Sospechoso M ta wordo acusa di a tene relacion cu e mucha muhe entre 1 April 2015 y 30 November 2015 y G. tambe ta wordo acusa di a tene relacion cu e mucha muhe menor di edad. Ademas Fiscal a mustra cu dia 31 October 2015, G. y M. lo a viola e mucha.
SENTENCIA
E sospechoso M. a wordo declara liber. Fiscal a exigi 24 luna contra dje. Sospechoso G. a wordo condena pa 24 luna di prison pa tene sex cu e menor 4 biaha. Fiscal a exigi 42 luna contra dje. Sospechoso V. a wordo condena pa 12 luna di prison, 6 luna condicional, pa grooming di e victima. Fiscal a exigi 36 luna contra dje.
E ta un sentencia historico. Ta prome biaha cu un sospechoso ta wordo condena pa grooming. ,
Nota di redaccion: Grooming ta ora un hende via medionan electronico (p.e. whatsapp of messenger) propone na un menor pa topa otro pa haci sex. Esaki ta castigable pa ley y awor e prome sentencia a cay.