Sra. Lisette Gomes di Fundacion Lisette Gomes a papia tocante un situacion fastioso cu a sosode diabierna ultimo den Neptaly Park, caminda un persona canando den e area a nota un hende homber sospechoso den un Toyota Yaris color blanco. El a confirma cu e homber tabata masturbando den e auto cu tabata para hopi cerca di e parke, caminda tabatin yen di muchanan. E homber a nota cu el a wordo descubri y a huy den e Toyota Yaris. E persona a alerta mas personanan den vecindario y a yama autoridad y notificanan e detayenan necesario.
Sra. Gomes a splica cu e caso actualmente ta bou investigacion di autoridad. Ta buscando pa wak si tin camaranan rond cu por a graba algo y pa nan wak kico nan por haci. El a sa di notifica tur e mayornan por medio di Facebook pa alerta esnan cu ta frecuenta Neptaly Park pa tira mas bista riba e muchanan y notifica autoridad di cualkier actividad sospechoso.
Sra. Gomes ta sugeri pa mayornan papia cu nan yiunan y riba tur locual cu por ta malo cu por presenta algun momento manera den un parke y grita pa ayudo si ta necesario y notifica adultonan. Fundacion Lisette Gomes tin mas di 8 aña ta lucha pa trece informacion y atende cu casonan asina. Sra. Gomes ta splica cu no tin informacion tocante e identidad di e homber di e parke y mester warda wak kico ta pasa di parti di investigacion cu ta andando, pero ta pidi pa henter pueblo ta alerta riba actividadnan sospechoso regardando e proteccion di e muchanan.