Diabierna mainta tabata tin tratamento di e caso FIST (asesinato Saraii Sierra na de Vuyst). Segun Fiscal e caso ta cla pa wordo trata de Corte. E caso aki a wordo trata PRO FORMA, den presencia di famia y conocinan.
Den Corte, hues a puntra tanto defensa como Ministerio Publico si acaso nan mester di mas investigacion, pa cual Fiscal a bisa cu nan ta sperando riba Hulanda, pa testnan di DNA cu nan a laga haci, pero e cu e caso por bisa ta ‘practicamente cla’ pa wordo trata. E sospechoso Chaljub a haci uzo di su derecho di no hiba palabra e biaha aki.
Pa loke ta defensa, abogado D. Ellis a pidi hues pa scucha 3 testigo, entrenan e pareha A. V. y R. Y. cu lo tin cu ‘prueba’ e alibi di su cliente J. C. Tambe a pidi pa scucha ruman di Saraii, S. Sierra.
Hues a bay di acuerdo cu tur e peticionnan y a fiha 14 di september 2018, pa 9 or di mainta, unda cu e caso lo wordo trata ‘inhoudelijk’.
CASO
Tabata diabierna merdia, dia 3 di November 2017, unda cu ruman di Saraii ta yega cas na De Vuyst y haya su ruman muhe den baño y no tabata reacciona. E victima tabata tin un saco na cabes y mara cu waya. E rumana sali na careda pa cas di un familiar pa pidi yudansa.
Ora cu famia ta yega e cas, nan ta constata e situacion penoso y ta bati alarma na Polis. Patruyanan ta yega di biaha y cera e area y recherche hunto cu departamento forensico di Cuerpo Policial a presenta pa bay haci investigacion profundo na e cas. A cera e area pa ningun hende yega cerca.
E sospechoso, J.A. C. a wordo deteni dia 14 di Februari 2018 como sospechoso principal den e caso di asesinato di Saraii Sierra.