Dialuna atardi a tuma luga un manifiesto haci pa e famia di e mucha Zinnia cu a perde su bida dor di un agente di polis cu a dal’e cu auto y te cu awe nada no a bin pa dilanti di e caso pa cual e famia no ta contento cu e comportacion di husticia.
Mama di Zinnia, Michela Croes- Matos a splica cu den e manifestacion nan kier a wak si nan por a haya ayudo di parti di Parlamento y gobierno, pa nan por yega na nan carta cu Ministerio Publico te dia di awe, ainda no a duna e famia.
Tabata tin hopi pregunta, y despues di e conferencia di prensa, Sra. Croes- Matos, a yama Ministerio Publico varios biaha y e contesta tabata semper, otro siman ta haya e carta. E carta cu nan ta papia di dje, ta pa nan bay Hof cun’e, caminda cu nan ta sigui bringa e caso di Zinnia. Pero mirando cu nan no a hay’e, pesey nan a organisa un manifestacion. Awo cu tur hende ta na altura di kico ta pasando, nan lo por logra haya e carta.
Sra. Croes- Matos a yama diferente biaha, caminda cu eigenlijk cu ta su derecho y locual cu e como mama di Zinnia ta bringando pe, pero e ta haya ta un falta di respet cu nan no ta comunica cu nan y no ta bisanan e motibo pakico nan no ta haya contesta.
Fundacion Zinnia tin un plan C, y si mester D tambe, pero nan ta bezig awo cu artikel di ley, y Sra. Croes- Matos lo consulta esaki cu su abogado. Nan punto nr. 1 ta pa Zinnia haya su fair chance dilanti Hues. Y loke hues dicidi e ora, nan lo respeta. Nan no ta exigi, roga of pidi pa e agente policial bay cera, pero si e ta kere cu ley mester haci su trabao.
Cuerpo Policial no a a tuma contacto mas cu mayornan di Zinnia, pero Sr.Dolfi Richardson ta na altura cu e rapport di accidente di Zinnia ta mal traha door di su personal. Sra. Croes- Matos tabata tin un afspraak cu KPA, pero door di e marcha mester a cancela e afspraak.
E parti cu bo mester keda core tras di hende pa bo derecho, segun Sra. Croes- Matos, ta algo cu mester traha ariba dje. E no kier haci e caso di Zinnia algo politico, pero si e ta verwacht cu ken cu sinta, por yuda nan cu esaki.
Kisas famia di Zinnia tin pensa un tiki mas leu cu e caso di Zinnia, pero nan ta wardando ariba e carta di parti di Ministerio Publico. Mama di Zinnia a splica cu nan tin mas caminda pa cana. Y Ministerio Publico sa esey, y kisas esey ta e motibo pa cual nan no ta hayando e carta ainda. Asina Sra. Michela Croes- Matos a splica.