Diamars mainta, pa 8or tin e reunion den Parlamento tocante e investigacion di corupcion entorno minister di labor, Paul Croes. Un reunion cu fraccion di MEP a pidi un luna pasa, y a manda hasta un carta elabora pa recorda e presidente di Parlamento Mervin Wyat-Ras riba e urgencia.
Sinembargo e presidente di Parlamento den un entrevista a duna di conoce cu e mester a tuma un luna di tempo pa e por a evalua e urgencia di e peticion, riba cual sra. Wever-Croes a reacciona “Ta strañami masha cu e presidente tabata tin mester di asina tanto tempo pa evalua nos peticion. Pa cuminsa ningun caminda den reglamento di orden ta para cu e tin e autoridad di evalua un peticion. Pa di dos, den e caso specifico aki nos a haci dos peticion pa e reunion aki, sumamente elabora, cu tur motibo pakico tin urgencia den e caso aki. Pues, su splicacion ta incomprendibel y totalmente inaceptabel.
Ta obvio cu e presidente di Parlamento ta hungando un wega infantil, probablemente bou di instruccion di su lider di partido Mike Eman, pa asina deliberadamente viola nos reglamento di orden cu ta bisa cu dentro di 30 dia e reunion mester wordo teni.
Ta realmente tristo pa mira con e presidente di e organo mas halto constitucional den nos pais, ta haci mofa di e organo aki.
Durante e reunion lo mi enfoca dicon e reunion ta asina importante. Dicon Parlamento ta esun yama pa carga su responsabilidad. Dicon nos mester manda e señal corecto pa nos comunidad. Mike Eman y su Gobierno a faya, y nan a permiti e corupcion aki continua. Nan a scoge pa tapa e escandalo aki, cu nan sa di dje pa mas di un aña y mey. Pues, ta keda solamente Parlamento pa asumi su responsabilidad.
Y pueblo lo sa di husga esnan cu ta para na banda di husticia y na banda di pueblo, of esnan cu ta haci wega pa sconde e berdad, y pa sigui manipula. Pueblo di Aruba a cansa di politiconan di AVP cu ta bisa un cos y haci otro cos, cu no tin ningun tipo di credibilidad mas”, segun sra. Evelyn Wever-Croes di partido MEP.