E caso di parlamentario di Corsou, Jacinta Constancia no tabata uno facil pa hues Mauritsz de Kort, kende mester a presidi e caso aki den corte. Tur hende por corda cu riba dia 23 di Februari di e aña aki, e parlamentario di e fraccion di MFK, a dal parlamentario Gisele Thijsen-McWilliam di partido MAN, causando cu su nanishi a sangra den sala di Parlamento di Corsou. Pero e caso no a keda te akinan. Tambe e ta wordo acusa di a menasa miembro di Parlamento, sra. Elsa Rozendal. Ambos parlamentario a entrega keho na Landsrecherche contra Constancia. Segun Fiscal den e caso aki no tin base pa e pensa cu sra. Constancia por defende su mes riba immunidad den Parlamento. Maltrato no ta cay bou di ley di immunidat na Corsou.
Pa e motibo aki, diaranson, 21 di Juni, esta awe, fiscal di Ministerio Publico di Corsou, a haci un demanda den Corte pa 200 ora di castigo di trabao, di cual 60 ora ta condicional, 2 aña di prueba y 2 aña di “ontzetting uit ambt”, condicional. Es decir cu e no por eherce su trabao como parlamentario pa e periodo ya menciona.
Tin cu remarca cu durante e tratamento di caso den corte, Constancia tabata bao di emocion y a admiti cu el a dal McWilliam y a menasa Rozendal. Den su opinion, Rozendal no tabata tin nada di bisa, pasobra Rozendal mes a yega di haci cosnan cu ta inaceptabel, entre otro kibra bida di hende.
Mc Williams di su banda a acusa Constancia tocante compra di mondkapjes y di un otro banda, Constancia tambe ta trece dilanti cu tin situacionnan cu McWilliam tabata aden, tambe a cana fuera di ordo.
Varios parlamentario a wordo scucha durante tratamento di e caso aki, entre otro Gerrit Schotte y tambe ex parlamentario Eduarda y tambe algun personal di Parlamento pa sa for di nan kico por a pasa.
Di parti di McWilliam, el a bisa den su denuncia, cu e ta sinti cu e wanta cu el a haya tabata uno premedita y segun fiscal cu esaki a trece dañonan na salud di e parlamentario. Door di esaki a dicidi pa detene Jacinta Constancia. Maltrato premedita, ta prueba, segun fiscal, mescos cu e menasa cu a wordo haci.
Fiscal a mustra cu parlamentarionan, cu tin un articulo den ley cu ta bisa cu no por persigui parlamentarionan. Den e ley ey no tin nada para di maltrato, p’esey ta keda para. E wanta a cay durante reunion, no durante un schorsing. Fiscal a mustra cu e menasa tambe por keda para. P’esey Constancia no por haci un apelsacion riba immunidat como parlamentario.
Fiskal ta wak riba casonan cu a pasa na Aruba y Italia y con hues a husga den e casonan ey.
Fiscal a wak den pasado kico a pidi den casonan asina aki. E ta mustra cu Constancia ta un parlamentario y mester ta un ehempel pa pueblo. Como parlamentario e sa cu bo tin cu uza palabra y no uza violencia.
Un wanta no ta manera descibri den ley. Abobado mr. Jansen, kende ta abogado defensor, a bisa cu no por acusa Constancia di maltrato, igualmente riba e parti di menasa. E ta pidi pa absolve di e acusacionnan aki.
Factornan medico tabata leve. No ta tabatin marcanan visibel sino polis lo a saca potret y esaki no a tuma luga. E fisio ta di mesun partido politico como e dokter di cas cu a investiga Mc Wlliam.
E abogado a mustra riba casonan den Parlamento por ehempel Ricardo Isebia y Stanley Brown un a tira un glas di awa riba e otro, Nelson Pierre a dal Norbert George, na Aruba parlamentario Dowers a dal parlamentario Tromp. Den e casonan aki no a persigui ningun hende. Dicon Constancia si aworaki?
Mr. Jansen ta bisa cu ta parce cu fiscal kier bisa cu Constancia ta gaña pero e abogado ta bisa cu Constancia tabata habri riba tur detaye y a coopera cu e investigacion.
Dia 5 di Juli, pa 2’or di merdia, hues lo bay dicta sentencia riba e caso aki.