London, GRAN BRETAÑA- Dokternan por kita e mashinan for di un baby cu’n condicion genetico straño, contra di boluntad di su mayornan. Esaki segun un decision di Corte.
Specialistanan na Great Ormond Street Hospital a bisa cu Charlie Gardi di 8 luna tin un daño celebral ireversibel y lo mester wordo traslada pa cuido paliativo.
Su mayornan, Connie Yates y Chris Gard kier bay cu nan yiu Merca pa un posibel tratamento.
Pero hues a bisa cu ta na bienestar di Charlie pa kit’e for di mashin.
Hues Justice Francis a bisa cu el a tuma e decision cu e curason di mas pisa, pero cu e conviccion cu esey “tabata e decision corecto pa e mucha”.
Charlie, naci dia 4 di Augustus tin un malea yama mitochondrial depletion syndrome cu ta causa cu musculonan ta bira zwak na un manera progresivo.
Mayornan di Charlie a bisa e Division Familiar di Corte Supremo cu nan tabata kier a duna nan yiu “un oportunidad pa biba”.
Tata di Charlie, Chris Gard tabata visiblemente intrankil, mientras e tabata warda pa e sentencia.
Ora cu e hues a sentencia cu e tratamento por wordo para, el a grita “no” y tanto e como mama di Charlie, Connie Yates a cuminsa yora.
Nan abogado Laura Hobey-Hamsher a bisa cu nan tabata “inconsolabel” pa e decision tuma y nan no por compronde con e hues no por a duna Charlie sikiera e oportundidad pa ricibi tratamento”.
E pareha a cuminsa cu’n campaña pa recauda fondo pa e tratamento den exterior y recauda mas di un miyon dollar.