WILLEMSTAD- Ministerio Publico di Corsou lo demanda pa Corte ‘kita propiedad’ di ex prome minister Gerrit Schotte y su pareha Cicely van der Dijs. Ta trata di un proceso pa recobra placa cu Schotte y Van der Dijs a acumula. Aki ta trata di ‘un suma di riba 1.8 miyon (1.861.692 florin Antiyano) cu el a haña ilegal di corupcion den caso ‘Babel’.
Corte Comun di Husticia a dicta sentencia dia 21 di juli 2017 den Corte di Apelacion. Aki Schotte a keda sentencia di a tuma 200 mil dollar na soborno y falsificacion (falsheid in geschrifte). Tanto Schotte como van der Dijs a keda sentencia pa labamento di placa conhunto di e placa di soborno. A impone castigo di prison di respectivamente 3 aña y 15 luna, di cual 6 luna tabata condicional.
Den e caso contra Schotte pues, lo pidi corte pa Schotte paga e suma di 1.861.692 florin bek. Den e suma ta inclui 800 mil dollar, deposita riba un cuenta di banco Suizo riba un negoshi di e islanan Marshall, riba cual Schotte ta beneficiario. Contra vd Dijs lo pidi pa paga e suma bek di 205.274 Antiyano, cu ta un suma cu a bay personalmente pa e pareha di Schotte.
E casonan aki lo tuma luga dia 15 di Februari 2018 den un asina yama ‘regiezitting’.