Diabierna 2 di Maart, lo tin otro caso interesante den Corte, caminda cu e caso contra di J.P.E. y P.S.F. lo continua. Ta trata aki di e caso di asesinato di un dama di descendencia Chines cual a tuma luga dia 13 September 2016.
Tabata un diamars merdia cu na un cas na Wayaca un persona desconoci a drenta e hogar y asina los tiro riba dos persona den e cas, tanto un homber y un muhe. Pero e señora a fayece na e sitio debi na e tiro cu el a haya na su cabes, e homber a keda transporta cu urgencia pa hospital. Na e sitio Polis a cera e area pa start un investigacion profundo. Dokter Mungra a wordo yama pa asina constata morto na e sitio.
Ta trata di famia Chines comerciantenan conoci na Aruba. Recherche, departamento forensico, atraco team tambe a presenta na e cas pa haci nan investigacionnan necesario. E atracadonan arma a bay cu un auto Honda for di e cas, y esaki a keda localisa algun rato despues na Angochi, na altura di e veld di Sportboys. Departamento forensico a presenta tambe na e sitio pa haci investigacionnan necesario riba e auto. Testigonan a declara na polis cu nan a mira personanan desconoci subi un pickup den e area pero te ainda ken ta e sospechosonan ta desconoci.
Un rato despues Polis a persigui un pickup dobbel cabina cu algun persona aden. Polisnan a duna e chauffeur señal pa para den area di Shete pero e no kier a para. Polisnan a pidi refuerso y a start un persecucion cu a bin termina te na e sero di Conchi. Pero a resulta cu no tabata e personanan cu polis tabata buscando. Pa loke ta trata e victima, un persona masculino ta na Hospital hayando atencion medico pa su herida di bala cu el a haya na su curpa.
Dia 24 September, Husticia a anuncia dos detencion importante den e caso di homicidio na Wayaca. E dos sospechosonan deteni ta di nacionalidad Hulandes (naci na Boneiro) y un Chines.
Pa bon di e investigacion, tanto Polis como Ministerio Publico ta opta pa no suministra mas informacion na e momento aki. A gradici Prensa pa por tabata disponibel pa e anuncio aki den oranan di marduga y a sigura cu asina por suministra mas informacion, lo haci esaki den mas detaye.