E di 4 edicion di e “Aruba, I Do Vow Renewal” a tuma luga cu participacion di mas di 200 pareha, consistiendo di bishitantenan di Estados Unidos, Canada, Italia, Ecuador, Reino Uni, España, Argentina, Peru, Alemania, Hulanda, Brasil y Uruguay, como tambe di Aruba.
Pa prome biaha a conecta via “livestreaming” cu Facebook y Instagram pa famia y amistadnan por a sigui e parehanan durante e bunita ceremonia aki. E edicion aki a surpasa tur expectativa! Parehanan tawata feliz y bo por a sinti e amor den e publico.
Como maestro di ceremonia Edjean Semeleer a dirigi e evento aki. Andy Osbourne a oficia e ceremonia di renovacion di boto y a clausura e atardi cu Edjean cantando algun camcion dedica na e parehanan, compaña pa steelpan.
E aña aki a conta cu presencia di e pareha di actor y actriz influyente Colombiano Alejandro Estrada y Nataly Umana cu a renoba nan voto di matrimonio. E programa Colombiano La Red na Caracol TV tambe tawata presente pa captura tur e detayenan di e pareha durante e ceremonia. Representante di revista Southern Bride; Bailee Ross tambe tawata na Aruba pa experencia e edicion aki di e Aruba, I Do.
Tanto prome cu e evento, durante y despues di e evento Aruba a ricibi cobertura di diferente medio y e mesun participantenan tambe a comparti nan experiencia riba diferente red social.
Mirando cu otro aña lo bira e di 5 edicion, ya caba e preparacionnan lo cuminsa na A.T.A. pa asina por ofrece participantenan un experiencia inolvidabel, un biaha mas. Un danki grandi ta bay na tur persona y socio cu a contribui na e evento aki y na tur miembro di ekipo di A.T.A. cu a haci e evento aki posibel.
