Manera custumber, Cascabel Motorcycle Club ta organisando un otro bike ride. E ride ta pa un bon causa y esaki ta pa yuda bek na comunidad, segun Kenneth “Kenchi” Rasmijn, presidente di e club durante un conferencia di prensa cu a tuma luga na Manuelito’s Sportbar.
Tur esnan cu conoce e club, sa kico nan ta haci pa comunidad. E ride e aña aki lo ta fin di September. Inscripcion lo ta dia 30 di September. Normalmente e ride semper ta fin di Mei, pero door cu cierto circunstancianan a dicidi di schuif’e, pero pa otro aña por yega bek na e ride pa fin di Mei.
Rasmijn a splica cu dia 30 di September, na On the Rock, cuminsando pa 7’or di anochi, lo bay tin inscripcion. E lo ta 55 florin pa persona. Lo bay tin un live music entertainment riba e dia ey y ta spera pa tur hende yega pa asina yuda contribui na e ride y asina cu por yuda bek mas miho tambe na comunidad.
Dia 1 di October, e ride ta sali bek un biaha mas atardi, pa 7’or y mey, saliendo for di parkinglot di On The Rocks. Lo core rond di Aruba y lo termina na Tropicana Casino. Eynan tambe lo bay tin live music entertainment y tur participante lo haya un bebida por nada cortesia e casino. Diadomingo, riba e dia grandi, e ride lo sali pa 11’or y mey di mainta for di Garage Centraal. Lo bay tin diferente stop rond di Aruba. Ta haci e weganan popular durante e stopnan, unda cu e participantenan ta gana bon premio. Ta finalisa atardi na Baby Back Grill na final di caya grandi unda cu tur persona cu a inscribi lo haya na BBQ y tur e gruponan organisa lo ricibi nan plakkaat como recuerdo cu nan a participa na e ride di e aña aki.
Manera ta custumber, semper ta invita tur hende, hasta auto, carclubs. Si bo no tin brommer of bo no tin scooter, bo por bin, join e ride. Ta pidi vergunning pa auto y brommer y e ora ey por join cu auto, segun Rasmijn. Bo tin bo famia y disfruta hunto cu nan un dia hopi bon y pret. Pa medio di esaki Rasmijn ta probecha pa invita tur e bikeclubnan, cual ta basta pa menciona. Si bo no ta miembro di un club, esey no ta bisa nada. Djis bin, participa cu bo brommer, quad, scooter, auto, tur cos cu ta core riba caminda por wordo inscribi, bo ta haya bo ticket, tshirt y participa na tur e wega y premionan atractivo.
E prome dos pa tres añanan a yuda dos famia door di drecha full na cas, uno na Tamarijn y e otro na Ayo. A drecha cas op en top. Despues di esey a cuminsa yuda instancianan, entre nan Stichting Thuiszorg, yuda Stichting BOB, a yuda Sonrisa, Fundacion Autismo, Abby Croes, kende ta un agente policial kende a haya accidente di brommer y cu awo ta na Hulanda buscando su salud y via sociale werkster a yuda por lo menos cinco famia den necesidad y a bay supermercado cu nan, unda nan por a haci compras masha grandi mes. E idea ta pa e aña aki lo haci algo similar. No tin un stichting ainda cu lo bay yuda.
Por ta e por bira mescos aña pasa. Na December loke a haci ta cu ayudo di otro gruponan, a yuda un cas na Sabana Basora, unda a verf e cas, busca tur lo necesario pa e cas pa e hendenan aki por biba trankil.
E grupo aki yama Cascabel & Friends. E Famia a haya fridigaire, stof, cama, e cas geverfd, cashi paña etc.
Si tin fundacion cu kier ayudo por yama Cascabel, na telefon na 5929410, esey ta sr. Rasmijn. Y si e no contesta e lo yama di biaha bek. Pero si ta un instancia, fundacion cu ta pensa cu nan por wordo bon yuda, por acerca Cascabel, wak e situacion y wak ki yudansa nan tin mester y e ora nan ta yuda bek, segun Kenneth Rasmijn.