Diabierna e compania HA’BON a tuma e oportunidad pa hasi un bishista na CAS SPERANSA pa asina conoce un poco mas tocante e projecto aki cu a capta atencion. Cas Speransa ta un proyecto bao di e capa di HopeAruba Foundation cu ta brinda oportunidad na esunnan den adiccion. Esaki ta encera un curiculo / programa formalisa cu ta inclui agricultura como tambe e aspecto spiritual.
Pa mustra Ha’Bon su aporte na un iniciativa asina, Naline Heilbron di Ha’Bon – a hasi entrega di 200 habon na e fundacion. Stichting Trampolin cu ta un fundacion cu ta yuda esunnan cu limitacion pa haya trabao, tambe tawata presente – Stichting Trampolin ta hunga un rol hopi importante den e produccion di HA’BON. E productonan di HA’BON ta wordo produci y ensambla cu asistencia di personanan cu limitacion, asina brindando oportunidad pa trabao y demostrando cu personanan cu limitacion tambe por ta productivo den comunidad.
Alabes, e productonan di HA’BON ta un producto netamente local, cu ta wordo produci cu ingredientenan completamente natural, dunando asina e atencion na nos salud y medio ambiente. Den e proceso di produccion di habon semper ta keda retaso di habon y ta esakinnan ta wordo procea den un bara di habon recycla. HA’BON, como empresa ta duna su aporte na projectonan manera CAS SPERANSA. Iniciativa(nan) cu ta brinda oportunidad y cambio den nos sociedad cu ta den cuadro di e mesun filosofia cu e empresa ta para p’e. HA’BON lo sigi aporta na e projecto cu su productonan periodicamente ora tin capacidad den produccion.
HA’BON ta invita otro empresanan pa tambe sostene y aporta na e movemento aki.