Sra. Yvonne Webb-Kock, recientemente, directora di Monumenten Bureau Aruba, a bishita gerente di Biblioteca Nacional Aruba pa entrega un rapport di Cas Floria na Aruba. Titulo di e documento ta ‘De herkomst en betekenis van de versierde Cunucuhuizen op Aruba’. E rapport aki ta bay pa e coleccion nacional pa warda pero tin foyeto disponibel pa alumno di scol, pa por traha spreekbeurt of presentacion.
Sra. Yvonne Webb-Kock a guia e stagiaire di Hulanda, Romy van Voren, pa haci un investigacion. Romy van Vuren ta studiante di universidad di Utrecht. Den e documento tin splicacion di e simbolonan riba un Cas Floria, ta menciona e metslanan cu tabata specialisa pa decora cas, historia di Aruba y arkitectura di Aruba. Tambe un lista di Cas Floria na Aruba.
Na Aruba tin mas cu 200 cas cu bunita decoracion di diferente figura y simbolo manera figura di cortina, strea, flor, pico di paharo, medio luna, etc. Nos ta yama e casnan aki ‘Cas floria’ of ‘Cas decora’. Ta invita personanan interesa den e tema aki pa lesa mas na Dept. Arubiana.
Directora di Biblioteca Nacional Aruba, sra. Astrid Britten y sra Des Croes, hefe di Dept. Arubiana a keda masha contento cu e bishita di sra Webb-Kock.