Cas di Aruba cu gratitud pa e trabao di e POC den opvang di studiante

Na Cas di Aruba a tuma lugar diasabra 13 di juli un encuentro informal cu miembronan di e Plaatselijke Opvangcommissie (POC). E POC ta consisti di studiantenan Arubano cu ya caba ta studiando na Hulanda y conhuntomente cu e studiementor ta organisa e opvang pa e grupo di studiante cu ta biniendo Hulanda pa cuminsa cu nan estudio.

Coordinador di Departamento di Enseñansa di Cas di Aruba James van der Linde a yama e miembronan di e POC nan y e studiementornan bon bini y a bisa di ta contento cu hopi miem-bronan di e POC a acepta e invitacion pa ta presente awe na Cas di Aruba. Un saludo special tabata tin pa e grupo di mentornan nobo cu e aña aki ta experencia nan prome aña di opvang.
James a anuncia cu e aña aki lo tin dos vuelo for di Aruba. E prome vuelo ta yega diaranzon 31 di juli Hulanda, mientras cu un dia despues e otro vuelo cu studiante ta yega Hulanda.

Minister Plenipotenciario Suplente Eddy Paris a bisa di ta contento y orguyoso riba e trabao importante cu e POC y e mentornan ta haci pa ricibi y duna guia na studiantenan nobo.
Despues di esaki a haci un ronchi unda e mentornan y e miembronan di POC a introduci nan mes. Por a nota cu den e diferente POC nan tin basta studiantenan cu a yega aña pasa. Sigur un desaroyo positivo cu studiantenan cu tin un aña so na Hulanda ta mira e nesesidad pa brinda ayudo na e studiantenan nobo cu ta bin Hulanda.

Finalmente James van der Linde a desea e mentornan y e POC nan hopi exito cu e ultimo preparacionnan pa ricibi nos studiantenan.

Comments

comments