Den Haag – Recientemente un grupo di research students di Utrecht College University a sinta na mesa cu Minister Plenipotenciario Guillfred Besaril, director a.i mr. Glenn Ling, Representante di Aruba na Union Europeo Eddy Paris y Innovation Policy Officer Marilis Becker pa presenta e topico cu nan lo onderzoek durante nan estadia na Aruba.
Universidad di Aruba y Utrecht College University tin un convenio unda cu annualmente tin un intercambio di grupo di studiante di e diferente institutonan.
Januari venidero, un grupo nobo di UCU lo bay Aruba pa un trimester pa haci investigacion riba topiconan relaciona cu SDG’s (Sustainable Development Goals).
Gabinete Wever-Croes tin SDG’s como prioridad y Cas di Aruba tambe ta sostene e iniciativa di Universidad di Aruba y Utrecht College University.
Pa e motibo aki, Cas di Aruba hunto cu Jocelyne Ballantyne cu ta e coordinador di e iniciativa na Utrecht University College a organisa e encuentro entre UCU y Arubahuis.
E meta tras di e encuentro aki tabata pa e studiantenan presenta nan research proposals y ricibi feedback di Cas di Aruba riba nan topiconan y strategianan . E grupo di studiantenan a gradici e delegacion di Cas di Aruba pa e input valioso cu nan a ricibi. Cas di Aruba ta desea e grupo di studiante hopi exito cu nan research y sigur lo haci un follow-up den e proceso.
Nota pa redacion: E potretnan ta cortesia di Cas di Aruba