WASHINGTON D.C., Merca – Cas Blanco a informa diamars, cu presidente di Merca, Donald Trump, a paga 38 miyon di dollar na belasting riba algun ingresio superior na 150 miyon den su declaracion fiscal di aña 2005.
Gobierno kier a delanta asina na e cadena MSNBC, cu e atardi aki a anuncia cu a obtene un parti di e declaracion di impuesto di e presidente y cu e tabata tin e intencion pa divulga esaki.
E presentacion di e cadena MSNBC, Rachel Maddow, a anuncia diamars riba Twitter cu tabata tin acceso na e declaracion di Trump di 2005 y cu lo a bay publik’e pa 9’or di anochi ora local.
Trump a nenga tenasmente na publica su declaracion di impuesto, contradiciendo un tradicion politica na Merca entre e candidatonan na presidencia.
Desde e campaña di aña pasa, medionan a bin ta investiga e formularionan di impuesto, cu e obhetivo di determina e fuentenan di ingreso miyonario y e posibel conflictonan di interes.
Poco prome, un funcionario di Cas Blanco a revela e cifra di impuesto bao di e condicion di keda den anonimato y sin duna mas detaye of documento.
“Ta completamente ilegal horta y publica declaracionnan di impuesto. Medionan deshonesto por sigui haci esaki como parti di nan agenda, mientras cu e presidente ta concentra riba loke ta di dje, cual ta inclui un reforma fiscal cu ta beneficia tur Mericano,” e funcionario a bisa.
Fuente: NTN24