WASHINGTON, Merca – Cas Blanco a confirma awe, cu “no tin hustificacion pa e uzo di violencia” cu obhetonan di “promove un agenda politico”, refiriendo na e atake cu un molotov cocktail riba e oficina di Partido Republicano na North Carolina.
Ningun hende “lo beneficia di e vandalismo y violencia”, e vocero di presidencia, Josh Earnest a subraya, durante su rueda di prensa diario ora cu el a papia riba e atake, cu a afecta un oficina Republicano den e condado predominantemente democrata di Orange, EFE a mustra.
E lansamento di un boter cu likido inflamabel atrabes di un bentana di e oficina ey, a kima muebles, material y borchinan di campaña, aunke no a provoca herido, segun polis local.
E front di e edificio tabata tin un swastica pinta y e frase “Republicanonan Nazi, sali for di e pueblo aki of boso lo wak,” e corant local, The Charlotte Observer, a informa.
Segun Earnest, incluso den un campaña electoral di “e retorica caluroso” como e actual, e “relevancia” di e diferencianan entre e planteamento di e candidatonan presidencial, e republicano Donald Trump y e democrata Hillary Clinton, “nunca por wordo uza pa hustifica violencia.”
E vocero, di un otro banda, a destaca e informacionnan encuanto varios democrata, of por lo menos ciudadanonan cu ta identifica nan mes como tal, ta purbando di recauda placa pa reconstrui e oficina Republicano afecta.
Y esey “ta coherente cu e vision optimista” di Merca cu presidente Barack Obama tin, cu valornan “cu nos ta hinca den e pais aki” y “cu e tipo di debate politico cu nos mester tin,” Earnest a agrega.
Tras e atake, Trump a culpa di loke a pasa na “e animalnan cu ta representa Hillary Clinton y na e democratanan di North Carolina”, den un mensahe riba su cuenta oficial di Twitter.
Clinton, di su banda, tambe a condena e hechonan riba un tweet, caminda el a sigura cu e atake tabata “horibel y inaceptabel” y a mustra “hopi gradicido cu tur hende ta safe.”
Fuente: El Universal