Willemstad Curacao: Djadumingu 4 di yüni 2017, alrededor di 23.14 or Sentral di Polis a dirigí un unidat polisial na Yukonweg pa un kas ku ta na kandela.
Na yegada di e unidat polisial, nan a konstatá ku ta trata di un kas di palu ku tabata kompletamente na kandela.
Unidatnan di bombero ku a yega na e sitio a kuminsá ku pagamentu di e kandela i no por a evitá ku e kas a kima por kompletu. Un hòmber habitante di e kas e deklará ku un ratu promé e la sali kas i laga su pareha huntu ku un kachó den kas. E kas no tabatin koriente pero nan ta hasi uso di bela pa asina tin klaridat den e kas.
Durante pagamentu di e kandela personal di bombero a topa ku un kurpa sin bida karbonisá den e kas. Dòkter di polis ku a yega na e sitio a konstatá morto di e dama. Nos ta publiká identidat di e víktima na momentu ku identifikashon ofisial tuma lugá.
Riba òrdu di Fiskal di Ministerio Públiko a konfiská e kurpa pa mas investigashon.
Kousa di e kandela ta den investigashon.