Anushka Cadeau ta e persona encarga cu e proyecto di Censo cu a gana e destaho publico. E ta splica con e sistema aki ta poni den otro, pa cuminsa haci e sistema di Censo limpi pa hendenan cu no ta biba mas na Aruba.
E compania cu Cadeau ta representa ta Core NV y ta ubica na Corsou. Nan ta ofrece servicionan manera application hosting, cloud services, network management y tambe consulting.
Den e cuadro di consulting a wordo adkeri pa via di fondonan di Aruba y segun e terminonan di referencia cu a wordo saca pa por ehecuta e proyecto aki.
Anushka Cadeau a splica pa trata e grupo di persona cual tin duda cu nan adres real ta na Aruba y e grupo di persona aki ta bay purba di localisa nan via di e siguiente pasonan.
Na prome instante nan ta bay ricibi un carta di e compania, cu ta e adres cu nan ta registra awor aki actualmente na Censo. Ora cu e personanan ricibi e carta aki nan tarea ta di bin cerca Core NV y pa bin registra cu nan ta biba realmente na Aruba y/of cu si tin cambio di adres pa por anota esey tambe. Den e carta ta poni specificamente ki dia e personanan aki mester yega y cual ora precies. Naturalmente tin cu compronde cu si ta trata di 12 mil hende, mester regl’e den un forma caminda cu ora e persona yega, e por wordo atendi mas lihe posibel sin hopi tardansa. Pesey ta haci un apelacion pa esnan cu ricibi e carta, pa tene bon nota di e dia y orario di presenta di forma cu e fluho tambe por cana mas lihe.
Den e carta aki tambe nan lo haya e adres specifico caminda e compania lo bay ta ubica pa ricibi e personanan aki pa por registra. E adres ta Perfect Fit System na Sabana Blanco 68-C. Perfect Fit System, ta caminda cu si bo bin for di aeropuerto, ta bira bay den cumana na e rotone di Wayaca y djey bay direccion Arubus. Den e caya di Arubus ta Sabana Blanco y Perfect Fit System ta keda algun meter despues di Arubus. Perfect Fit System lo bay ta habri for di diamars, diaranson y diahuebs, entre 9’or di mainta pa 3’or di atardi non stop.
Post Aruba lo cuminsa cu e reparticion di e cartanan aki pa invita e hendenan aki. Esaki lo ta desde mañan. E grupo di persona aki lo bay ta ricibi den e proximo simannan nan carta di invita pa pasa pa por registra. Ora haya e prome carta y no tin reaccion tin un di dos carta cu lo bay. Anushka Cadeau a splica cu despues di e di dos carta ainda tin mas momento cu lo atende pa toch yega na e persona, cu un fecha y ora specifico cu por pasa y por registra. Tambe pa por geef aan si tin cambionan necesario. Despues di e di dos carta aki, lo bay sigui otro metodonan di cual segun e proyecto ta canando, lo divulga, pasobra lo bay tin mas momento cu lo tin cu bin prensa pa prensa por sa kico ta e siguiente pasonan cu ta continua, despues di e di dos carta, e persona no presenta eynan. E meta final ta pa tin un registro civil mas limpi y confiabel posibel. Ta pesey un apelacion na e ciudadanonan di Aruba y tur esnan cu ta scuchando di e proyecto aki, cu si a ricibi un carta, presenta na Perfect Fit System. No ta tur hende ta esnan specificamente ta e grupo cu a menciona di 11 mil hende cu ta trata na localisa. Pesey ta bon si nan por presenta na e adres ya menciona pa asina nan por registra nan mes.