Skirbi pa Clyde Harms
Recientemente un postpakket manda di Merca Via Airmail 18 di october a dura casi un luna pa yega na mi adres. Casualmente, e mes un dia, november 16, mi a ricibi un carta for di Hulanda cu a wordo manda 28 di october, 10 dia despues!
Varios biaha caba mi tabatin e experiencia cu un post manda di Merca ta tarda un cantidad di tempo sin hustificacion y pa curiosidad mi a haci un investigacion pa haya un splicacion pa e tardanza. Naturalmente e investigacion ta superficial pasobra mi no por haya tur informacion, pero mi ta kere cu un conclusion por wordo saca for di e echonan cu mi por a constata.
E postpakket no ta un caha grandi. E ta un “Photo/Document Mailer” di postkantoor di Merca cu ta midi apenas 6.5 pa 9.5 duim y tabata pisa 85 gram. (mira foto adhunto). Mi yiu a paga $14 pa mand’e mientras cu e carta cu a bin di Hulanda cu ta un poco mas chikito a paga solament € 1.
Mi por a constata cu e envelope a wordo habri pa servicio di Douane dia 3 di november “voor visitatie”, dos siman despues cu el a wordo gepost na Merca. (Esaki ta pa nan por a calcula y impone invoerrechten riba e contenido). Mi ta imagina mi cu asina cu Douane a marca riba e envelop loke Postkantoor mester cobra, e envelop a bay pa personal di postkantoor. Pero a dura 13 dia mas prome cu mi a ricibi e notificacion di posterijen pa bay busca e pakket.
Pakico e tardanza? A tuma personal di Posterijen asina tanto dia pa pepara e notificacion cu mester bay pa e “geadresseerde”? Ta servicio di Douane a tene e pakket atras? Of ta e post besteller a tuma tanto tempo pa entrega e notificacion. Abo haci bo conclusion! Posterijen no tin splicacion.
Pa fabor manda bo comentario pa [email protected].
