Siman pasa tabata circula un rumor, caminda cu Minister di Educacion. drs. Rudy Lampe lo a retira e trahadonan di Trai Merdia. Esaki sigur no a cay den bon tera cerca e trahadonan aki. E minister en cuestion, den un conferencia di prensa a nenga esaki categoricamente.
Loke cu nos di Masnoticia por a compronde ta cu tur trahado di Trai Merdia lo bay dos hora atras, contrario na declaracionnan di minister. Tur docente y lidernan di centro lo bay traha dos hora so pa dia. Esaki un biaha mas mester bisa cu no a cay den bon tera cerca trahadonan di Bureau Trai Merdia. E medidanan aki, lo mester drenta na vigor entrante 1 di januari 2019 y lo ta valido te cu 30 di juni 2019.
Es decir, cu entrante 1 di juli, e trahadonan di Bureau Trai Merdia lo no tin trabao mas? Kico lo para cu e muchanan cu ta bay Trai Merdia na comienso di e aña escolar nobo. Con e minister lo bay hinca esaki den otro, si tur hende lo traha dos hora so pa dia. Y despues di e dos oranan aki, kico lo para di e muchanan? Ya caba tin scarsedad di maestro pa vang op e muchanan di Trai Merdia.
Scol ta caba 1 or y 05 mas o menos, ken ta bay vang op e muchanan despues di scol? Si tur e maestronan trahando na Trai Merdia lo cuminsa pa 3 or di atardi?
Docentenan ta exigi un claridad ariba henter e asunto aki. Y no por bin tira algo asina no mas, asina sin mas.
Di parti di sindicato TOPA, por a compronde cu nan a reuni cu minister di Educacion, drs. Rudy Lampe diabierna ultimo, caminda cu a cada acorda, cu cartanan cu e directora interino a manda pa docentenan, ya no tin validez. E minister mes lo bay encarga cu esaki pa asina trece claridad y trankilidad bek den Bureau Trai Merdia