E cadena Frances di supermercado Carrefour a cuminsa exhibi desde diahuebs, borchi den su tiendanan na Francia pa notifica e clientenan riba nan decision pa baha fo’i shelf e productonan di e grupo PepsiCo debi na nan “prijs inaceptabel,” e median local a informa.
“Ya nos no lo bende e marca aki debi na un aumento di prijs inaceptabel. Nos ta pidi disculpa p’e molesternan causa,” por a lesa riba e borchinan cu ta circula riba e rednan social, y cu e mensahe compaña p’e onderschrift: “Carrefour, comprometi cu e bahamento di prijs.”
E compania lo retira for di nan shelf tur e productonan di e grupo PepsiCo, incluyendo e bebidanan Pepsi, Lipton y 7Up, potato chips Lay’s, Doritos, como tambe e productonan di e marcanan Benenuts, Alvalle y Quaker.
Carrefour tabata un di e minoristanan mas activo pa reta prijs di e multinacionalnan di producto di consumo y di alimento, Reuters ta reporta.
Na september ultimo, e empresa Frances a purba pone presion riba PepsiCo pa reduci e prijsnan mediante e “campaña di reduflacion”. E ora, un total di 26 producto a wordo marca den nan supermercadonan na Francia cu label cu ta adverti riba e disminucion di volumen, sin cu p’esey baha e prijsnan.
Di su parti, e minister di Finansa Frances, Bruno Le Maire, a menasa na juni 2023 cu recupera e ganashinan “indebido” di e empresanan alimentario cu belasting special si no reduci e costonan n’e consumidornan cu ya tabata lucha cu e costonan halto di coriente.
