Juni 1935, Carlos Gardel a bin Aruba y duna un presentacion na Teatro Gloria di Shon Eddy de Veer. Di e cas di mi wela na crusada di Steenweg y Kruisweg mi a mira Gardel y su entourage yega y mi ta corda con Max, un enano hopi conoci den Playa, tabata carga maletanan di Gardel.
E potret adhunto ta di Juni 2, 1935 dia cu Gardel a biaha pa Corsow. ESAKI TABATA E PROME BIAHA CU CARLOS GARDEL A BULA DEN UN AVION. Carlos Gardel tabatin un miedo panico di subi den un avion. Di Buenos Aires el a biaha pa Corsow den bapor y di Corsow el a bin Aruba den un bapor tambe. Pa bay Colombia, Gardel a dicidi di bay Corsow cu avion pa e por subi un bapor cu lo hibe Baranquilla di unda e lo a bay Medellin.
Na Medellin nan a trata Carlos Gardel manera un rey, Rey del Tango. Na tur su presentacionnan durante mas di un siman e teatronan tabata yena te casi rementa. Despues Gardel a bay Bogota, otro caminda cu e tabata super popular.
Dia 24 di Juni e tabata den un avion pa bay Cali, pero nan mester a para na Medellin caminda centenares di su fanaticonan a bin cuinde. Despues di e entrevistanan, sacamentonan di potret y hopi combersashon cu prensa y dignitarionan, Gardel a subi avion atrobe. E avion a haya permiso pa cuminsa su salida 3or pm. Desafortunadamente, un otro avion, un otro TriMotor cu nomber Manizales, tambe a haya orden pa prepara pa nan take-off. Segun e rapport oficial di autoridadnan di aeropuerto, bientonan duro cu tabata supla a desvia e avion di Gardel y a bay dal contra Manizales y tur dos a coy candela cu a causa morto di Carlos Gardel y 16 persona mas. Solamente tres persona a sobrevivi.
IRONIA: 23 dia despues di bula pa prome bes den un avion, Carlos Gardel a muri den un avion, RIBA TERA!
Skirbi pa Clyde Harms
