Na 2014 Parlamentario mr. Andin Bikker hunto cu un delegacion di Parlamento a asisti na un curso di siguridad den turismo na Merca. Asina a sera conoci cu Dr. Peter Tarlow, kende ta un experto mundialmente renombra riba siguridad den e industria di turismo y durante eventonan internacional. Tarlow ta autor di bukinan manera “Tourism Security: Strategies for Effective Managing Travel Risk and Safety” y “Event Risk Management and Safety”.
Na varios ocasion Dr. Peter Tarlow a bin Aruba y e tin un gran aprecio pa nos isla y su habitantenan. Pa es motibo aki mes e kier duna di su parti pa yuda Aruba referente e tematica di seguridad di turista y prevencion y combatimento di criminalidad en general. Durante di su bishitanan na islanan den Caribe Dr. Tarlow a constata cu tin un necesidad pa introduci un academia pa por profundisa na un manera scientifico y structura riba e tematica, mirando e diferente retonan cu areanan den Caribe y rond mundo cu ta depende grandemente di turismo ta pasando door di dje.
Asina a dicidi conhuntamente cu Parlamentario mr. Andin Bikker di firma un letter of intent pa bay institui un academia yama “Caribbean Security Institute”, unda cu lo bay haci research y duna cursonan annual. E academia aki lo percura pa mas cu 300 turista bin Aruba pa seminarionan anual cu lo wordo organisa dor di e academia, y di e manera aki ta subraya cu den Caribe y specialmente na Aruba tin atencion pa e dimensionnan di siguridad di turismo, siguridad en general di nos Pueblo, y pa asina yama “Event risk managment”, esta seguridad durante eventonan.
Dr. Peter Tarlow tin mas cu 25 aña ta duna curso y conseho na diferente luga rond mundo, entre otro na Las Vegas, Merca, cual destinacion ta haya un average di 43 miyon turista pa aña.
Den e letter of intent firma ta expresa cu den transcurso di 45 dia lo bay over na incorpora e academia unda cu lo bay enfoca riba Aruba y Caribe. Por ehempel hermana isla Corsow tin hopi atencion riba seguridad di turismo cu creacion reciente di “PoliTur”, esta un departamento di e Cuerpo policial cu ta dedica na seguridad di turista. Ja caba Cuerpo policial di Corsou ta haciendo uso di e experticio di Dr. Peter Tarlow. Andin Bikker ta considera cu e prome paso tuma pa medio di e letter of intent pa creashon di Caribbean Security Institute algo sumamente positivo y historico pa nos industria di turismo y nos Pueblo en general. Testigo di e ceremonia di firmamento di e letter of intent tabata entre otro Sr. Ernst Mohamed, Presidente di Camara di Comercio y Industria, kende basicamente a expresa di ta haya e iniciativa uno hopi positivo pa nos isla.