E weekend cu a pasa Caribbean Sea Jazz Festival a celebra su di 10 aniversario den grandi. E organisacion a prepara nan mes bon pa asina por presenta dos dia di concierto na e pueblo di Aruba y su bishitantenan international.
Diabierna 23 di September CSJF e lineup tabata fabuloso pa habri e festival cu artistanan cu a trece un ambiente sublime cu a entretene e publico grandi cu tabata presente. E orkesta di Jazz di Franklin Granadillo a prenseta un reportorio unico estilo “Big Band”, Live Xpressions tambe a inspira e publico na comienso di e festival.
Riba e stage Divi Tony Succar y su Unity a presenta riba e promer dia cu musica estilo Latin Jazz cu a impresiona e publico masha hopi, especialmente e show riba percusion cu Tony Succar a duna. Dumpstaphunk cu e rumannan Neville tabata tremendo, bayendo bek den tempo cu musica funk y preparando e publico grandi pa loke tabata bin despues pa sera e anochi. Kool & The Gang a sera e anochi cu un repertorio spectacular di exitonan cu a pone e publico baila y gosa te na final den marduga di diasabra. Matt Biano y New Cool collective a presenta na reportorio sofistica riba e esenario Purple caminda cu e publico sigur a disfruta.
E di dos anochi a habri cu Cesar Lopez y su Habana Ensemble riba stage Divi deleitando e publico cu musica Jazz latino y su habilidad virtuoso riba saxophone. Despues e publico grandi a acudi na stage Padu cual tabata e escenario principal caminda cu Izaline Calister a pone e publico baila sin fin riba su ritmonan jazz afro-caribense y tropical. Izaline a presenta su exitonan conoci combina cu cancionnan di su Album nobo “Rayo di Lus”.
Den e parti paden riba stage Purple Levi Silvanie a duna un presentacion espectacular hunto cu Randal Corsen riba piano y keyboards, e publico no kier a move te ora cu e Levi a toca y canta su ultimo cancion entre otro e exito “Ami ta”. E anochi a sera cu Tony Succar hunto cu su banda Unity cu Jon Secada presentando e tributo na Michael Jackson estilo Tropical. Esaki tabata un presentacion unico cu tambe a pone e publico baila y gosa. Y pa finalisa e grupo musical Jemm despues a tene un tributo na e legendario Prince cu a fayece e aña aki y Ben Liebrand a sera e anochi cu su mescla di musica di decadanan 70, 80 y 90.
Durante e dos anochinan aki nos artistanan di arte tambe a duna un bunita presentacion obranan colorido, varios cuadra entre otro esun di Izaline Calister a resalta. Durante e dos anochinan varios obranan di arte a ser bendi na e publico.
Un cantidad record di publico a atende e festival e aña aki cual ta hacie esun di mas grandi di e 10 añanan di e Festival. Un danki hopi special ta bay na e sponsor principal Aruba Tourism Authority, Aruba Airport Authority, Renaissance Hotel, Divi Resorts, UNOCA y Chill pa nan contribucion y apoyo. Na tur boluntarionan cu a coopera, sponsornan cu a brinda nan confiansa un biaha mas den e grandioso evento musical anual aki, na tur colaboradornan y medianan di Aruba cu ta sostene e evento aki, masha danki. Sin e bon cooperacion di un y tur e festival aki no por a logra e exito grandi cu e a logra durante e ultimo 10 añanan aki. Aruba Sea Jazz Foundation ya a cuminsa planea pa e festival di otro aña y ta spera cu esaki lo ta un otro exito pa Aruba.