CARACAS, Venezuela- E petrolero estatal Venezolano, PDVSA a manda un cargamento di crudo balor ana 35 miyon dollar como un pago parcial na e ONGC Indio, Videsh Ltd, pa dividendonan atrasa den un desaroyo hunto, segun dos persona familiarisa cu e operacion.
E pago ta basa ariba un acuerdo firma na 2016 pa PDVSA y ONGG Videsh, un taki di e e compania di inversion den exterior di Oil and Natural Gas Corp di India, pa manda casi 530 miyon dollar den dividend pa su proyecto petrolero San Cristobal na Venezuela.
Pero Petróleos de Venezuela (PDVSA) no a haci niun pago den mas di un aña na e ONGC Videsh, fuentenan a afirma. Esaki ta debi na e crisis economico den e pais Suramericano y sancionnan cu ta complica e pago a trabes di banconan Mericano.
Esaki a cambio ora cu 500 mil bari di crudo Venezolano a sali di e waf di Jose na october, según un di e fuentenan.
“ONGC Videsh a confirma cu na october 2018 PDVSA a asigna e crudo Mery 16 pa 500 mil bari na e ONGC Videsh pa e pago di dividendonan pendiente”, e compania Indio a confirma den un email na Reuters.
No a keda mucho cla cual barco lo ta transportando e crudo. E tankeronan Iwatesan y Kassab a sali for di e waf Jose varios siman atras cu e waf Indio Sikka como destino, segun datonan di siguimento di embarcacion di Refinitiv Eikon.
PDVSA, cu ta den corte Mericano y di otro paisnan pa debenan pendiente, recientemente a cumisna paga algun acreedor, mas tanto den petroleo, pa evita mas beslag ariba activonan.
E pago di ONGC a bay door di intermediacion di Reliance Industries, operador di e compleho refinador mas grandi di mundo. Reliance lo ricibi e crudo Venezolano y finalmente lo paga 35 miyon dollar na ONGC, segun un di e fuentenan.
“Door cu e proceso di pago a cuminsa, nos ta spera di ricibi mas di e cargamento aki pa asina reduci e pagonan pendiente”, un di e fuentenan a bisa.