Cardinal George Pell, ex nr 3 di Vaticano condena pa pedofilia

Cardinal George Pell den corte.

MELBOURNE, Australia- E cardinal Australiano George Pell, ex number 3 di Vaticano y e representante mas halto di Iglesia Catolico cu a wordo declara culpabel di pedofilia, diaranson a wordo condena na 6 aña di prizon pa abusonan cometi contra di mucha.
E hues Peter Kidd, di un corte di e ciudad Australiano Melbourne, a bisa cu na momento di defini e sentencia e tabata tene cuenta cu e delitonan ‘horibel’ y e edad avansa (77 aña) di e cardinal. Pell tabata enfrenta un castigo maximo di te cu 50 aña pa a abusa di dos mucha homber chikito, cu tabata forma parti di e coro di su misa den e decada di 1990.
Pell, cu ta insisti den su inocencia, a presenta den corte di Melbourne despues di a wordo haya culpabel pa cinco crimen sexual contra dos mucha homber chikito den e añanan 1996 y 1997.
E religioso, cu tabata bisti cu’n camisa preto, pero sin e tradicional coyar clerico blanco, a keda sinta y impasivo, mientras cu hues Kidd a describi e atakenan contra e dos misdienaarnan.
Pell “lo no por biba suficiente tempo pa wordo libera di prizon”, Kidd a bisa.
E cardinal a wordo obliga di firma e registro di agresornan sexual y lo mester cumpli un minimo di tres aña y ocho luna di prizon di su castigo di 6 aña.
El a wordo haya culpabel di a hinca e muchanan den un skina, cu e tempo ey tabata tin 13 aña y tabata becarionan di e prestigioso scol St. Kevin y abusa di nan na december 1996. E abuso a bolbe tuma luga cu un di e muchanan apenas dos luna despues.
“Tin un nivel di humiyacion cu cada un di su victimanan mester a sinti ora cu nan sa cu e abuso a tuma luga dilanti di e otro”, e hues a bisa.
Un di dos hobennan cu a sufri di abuso a fayece na 2014 door di un overdosis di heroína.
Pell ta e representante mas halto di herarkia catolico cu ta wordo condena pa abusonan sexual contra menor di edad. Te cu recientemente e tabata responsabel pa e finanzas di Vaticano.
Diaranson, sin embargo, hues Kidd a insisti cu tabata cardinal Pell esun cu a wordo condena y no Vaticano.

Comments

comments