CIUDAD DI VATICANO, Vaticano- Na comienso di Juli e Sumo Pontifice a retira e Cardinal Gerhard Ludwig Muller, kende tabata encarga di investiga abusonan sexual. “Mi no por acepta esaki”, e cardenal a declara den un entrevista.
E cardenal a desata un polemica den e seno di Iglesia Catolico ora cu ela critica abiertamente su retiro, decreta pa Papa Fransisco y anuncia dos siman pasa. Te cu dia 2 di Juli, Muller tabata dirigi e Congregacion pa e Doctrina di Fe, cu ademas di cuida e conservacion di e doctrina Catolico, tabata dedica na investiga delitonan grave den Iglesia, entre nan abusonan contra menornan di edad.
Den un entrevista cu e corant Aleman ‘Passauer Neue Presse’, cardenal Müller a califica di inaceptabel su despido. Segun e cardenal, papa Fransisco a anuncia den un reunion hopi cortico cu e lo no extende su contrato, dos dia prome cu esaki termina y sin duna splicacion.
“E no a dunami motibo”, Muller a bisa. E cardenal ta compara e manera di proceder di e Pontifice cu e hechonan di lunanan antes, cu tres miembro halto den e Congregacion pa Doctrina di Fe”. “Mi no por acepta e manera aki di proceder”, Muller ta enfatiza.
E corant no a specifica di kico ta trata, pero un siman prome cu Muller, otro persona cu cargo halto den Vaticano, e cardenal George Pell, cu tabata dirigi e Secretaria di Economia di Santa Sede, a ricibi un permiso di ausencia pa presenta den un Corte di Australia, pa acusacionnan di abuso sexual.
Segun Muller, e “doctrina social di Iglesia mester wordo aplica tambe na e empleadonan di Vaticano”, algo cu segun e cardenal, no a sosode.
Di otro banda, e cardenal Muller, cu ya caba pa 5 aña ta na cabes di e Institucion cu a reemplasa e antiguo Inquisicion Romano, tabata un conservador oponente na e vision Libera di Fransisco, vooral ariba materia di divorcio. Di otro banda, su nomber a wordo macncha den varios ocasion pa casonan di abuso sexual den iglesia, cual supervision tabata na su encargo.
Fuente: www.actualidad.rt.com