Awe den oranan di mainta e sospechoso den caso Avestruz Pieter Susebeek a haya su libertad, despues cu e tabata den Corte.
Loke cu a hala atencion cu no solamente famia a acudi pa busca Susebeek ora cu su ordo di libertad a drenta na vigor pa 11’or di mainta, sino tabatin un caravana di simpatisantenan di AVP para pafo di e entrada pa tereno di KIA.
Di leu por a scucha himnonan di AVP tocando y cu a stop te ora cu Susebeek a bandona e sitio den un auto preto.
Manera ta conoci, Susebeek ta deteni for di inicio di mei como sospechoso envolvi den caso di iregularidad den otorgamento di terenonan di gobierno. No solamente e ta un di e sospechosonan pero tin nombernan grandi, tur liga na e partido berde, cu a wordo deteni caba manera Franklin Abath, Freddy Every, Leoncita Arends, pareha Ninusca y Gaby Werleman, y tambe e exminister y candidato di AVP Benny Sevinger.
Tur e personanan deteni den e caso di otorgamento di tereno, soborno, falsificacion, etc., ta wordo deteni y interoga. Na momento cu nan detencion no ta necesario mas, ta laga nan liber. Pero esaki ta nifica cu nan a wordo declara liber di persecucion. E caso mester bini dilanti un Hues ainda, kende ta esun cu lo bay evalua tur e pruebanan presente y si mester condena, cuanto tempo nan ta haya di castigo.