CARACAS, Venezuela- Mei mei di e escasez di placa cash cu ta existi na Venezuela, Alcaldia di Caracas a lansa un moneda local nobo: Caribe.
Alcalde di Caracas, Erika Farias, diadomingo a anuncia cu e mecanismo di intermediacion a wordo poni den funcionamento. Esaki ta un manera di facilita operacionnan comercial organisa pa autoridad municipal.
Farias a splica cu a manda print biyetenan di 5, 10, 20, 50 y 100. Cada caribe ta ekivalente na 1.000 bolívar (0,001 dollar na e cambio paralelo of riba e mercado negro).
Obhetivo di e moneda
Segun palabranan di e maximo autoridad Caraqueño, e alternativa ta surgi door di e contrabanda di e moneda oficial Venezolano, e bolivar, cu ta wordo bendi pa e mafia, tanto na e pais como den exterior di e pais Suramericano pa un balor hopi mas halto di loke ta para ariba e biyete. Segun Farias, esaki ta parti di e guerra economico contra di Venezuela.
E asina yama guera economico, mei mei di e sancionnan contra di e pais, ta wordo caracterisa pa e nivelnan di inflacion halto, speculacion di prijsnan y servicionan. Esakinan ta wordo fiha pa medio di un tipo di cambio artificial como tambe e scondemento di alimento y remedi.
Cu e mesun obhetivo aki, na final di februari, gobierno Venezolano a lansa e Petro, un criptomoneda respala pa reservanan di petroleo y oro, como un manera di afronta sancionnan economico y financiero imponi door di Merca y Union Europeo.
Unda e por wordo uza
E caribe por wordo uza den actividadnan comercial organisa pa e alcaldia di e capital, unda cu principalmetne ta bende productonan alimenticio y di higiena personal.
Na cada punto di benta di e moneda aki autorisa, interesadonan por haci transferencianan electronico bancario cual lo wordo duna na nan den caribe.
Na final di aña pasa, e organisacion popular colectivo, Alexis Vive, a lansa un moneda comunal yama panal. E moneda aki tabata tin como meta facilita e intercambio di bienes y servicio den e zona unda cu Comuna el panal 2021 ta opera, cual ta situa den e parokia popular Caraqueño 23 de Enero, west di e capital.
Fuente: https://actualidad.rt.com