Car Colour Aruba ta orguyoso di anuncia reapertura di nan tienda ultra-moderno na Tanki Leendert 103, hunto cu introduccion di e marca di verf WANDA den e mercado local.
Ricky Beaujon, CEO di Car Colour Aruba, ta splica cu e factor di prijs ta hungando un rol mas determinante den e mercado local y Sikkens, un marca di verf renombra mundialmente, no por competi den un guerra di prijs debi na su calidad superior. Como tal, e team di AkzoNobel a sugeri WANDA, un verf cu si por competi den prijs sin sacrifica calidad.
Viviane Martins, Regional Sales Manager pa VR Latin America, a agrega cu WANDA tin mas cu 85 aña di experiencia den e mercado internacional y ta wordo bendi den mas cu 90 pais rond mundo. Ademas, e ta enfatiza e enfoke di AkzoNobel ariba e hende, planeta y verf, y e decision consciente pa stop di uza lood y chromate den nan productonan debi na e efectonan negativo ariba medio ambiente y salud di profesionalnan.
Carlos Santander, consultant technico di AkzoNobel, a duna informacion adicional tocante e aspectonan di WANDA, cu su cubrimento ora cu spuit ta mas halto cu otro verfnan den su categoria y cu su primer y clear coat nobo ta na un calidad superior pa e segmento di mercado di WANDA.
E reapertura di Car Colour Aruba a wordo celebra cortando e sinta door di Roly Sint Jago, kende a lidera e compania pa varios aña.
Pa mas informacion tocante Car Colour Aruba y e marca di verf WANDA, por fabor bishita nan website of tuma contacto directamente cu e compania.
Car Colour Aruba
www.carcolour.aw
+297 582 8824