ROMA, Italia- E capitan Italiano Francesco Schettino a bolbe perde su caso den casacion y wordo condena, un biaha mas, na un castigo di prizon di 16 aña y un luna. Corte di Casacion di Italia a confirma esaki diabierna na Reuters. Asina tambe e proceso cu ta andando desde 2013. Awor si Schettino lo mester bay cera. E no tabata presente durante e ultimo sesion aki.
E Italiano ya caba na 2015 a wordo haya culpabel di homicidio involuntario door di su rol den e naufragio di e crucero Costa Concordia na 2012. Su abogadi a apela e caso y a exigi un reduccion di castigo, pero esaki a wordo nenga. E caso di diabierna den Corte di Casacion no a trece cambio den esaki.
E castigo ta consisti di 10 aña pa homicidio involuntario, 5 aña pa a ocasiona e tragedia y un aña pa a bandona e personanan cu ainda tabata abordo di e crucero. Ministerio Publico den Corte di Apelacion a exigi 27 aña pa Schettino.
Na 2012 e crucero Costa Concordia cu mas di 4 mil pasahero pasahero como tambe miemrbonan di tripulacion a dal contra di e barancanan cerca di e isla Giglio. Den e tragedia aki 32 persona a perde nan bida.
Durante investigacion a sali na cla cu Schettino di 56 aña tabata purba di impresiona un señora abordo di e crucero y cu pa malo el a nabega cerca di costa. Despues cu e barco crucero a dal contra di e barancanan, Schettino tabata un di e promenan pa bandona e barco. Cu esaki el a viola e prome regla di nabegacion, esta cu e capitan ta e ultimo persona pa bandona e barco, despues cu tur hende a wordo rescata.
Fuente: www.reuters.com