Siman pasa a tuma luga negociacion pa un CAO nobo cu tabata sumamente exitoso pa e compania estatal Fuels Marketing & Supply Aruba N.V.
Durante 5 dia a tuma luga e negociacion intensivo pa un CAO nobo mirando cu esun anterior a yega su final na Mei di e aña aki. “E negociacion a bai den un ambiente hopi ameno. Nos tabata hopi transparente cu otro caminda nos a brinda e sindicato informacion nan specifico referente nos compania”, Gina Maduro HR, Training & Development Manager di Refineria di Aruba N.V. ta splica.
Desde 1 di October 2016, e departmento cu antes tabata resorta bou di Refineria yama Valero Marketing & Supply Aruba a converti den un compania estatal cu e nomber Fuels Marketing & Supply Aruba N.V. Na aña 2014, IOWUA a sera e ultimo CAO cu Valero Refinery pa e trahadornan cu tabata resorta bou di Refineria. E cambio di mas grandi awo ta cu a enfoca riba e compania estatal embes di e Refineria. E CAO a conoce cambionan structural y den formato. Adicional a percura pa simplifica e lenguahe di e CAO pa asina un y tur por compronde e contenido un poco miho.
Sr. Tito de Cuba un experto den leynan laboral di Aruba y HR Consultant den region, a keda acerca pa RdA pa forma parti di e negociacion y tabatin un rol crucial. Sr. Tito de Cuba ta comenta cu un CAO ta un instrumento pa e trahadonan, unda ta stipula nan derechonan y tambe nan obligacionan. “Locual pami a resalta den e negociacion aki ta e sinceridad y comprension di ambos partido pa yega na un meta cu lo beneficia tanto e empleadonan como FMSA”. Durante e ultimo dos dianan a concentra riba e programa y beneficionan di e trahadonan, unda tambe a haci diferente ahuste. Di parti di IOWUA Sr. Boy Anthony ta splica cu a pone enfasis riba e beneficionan secundario y tambe riba oportunidad pa futuro. Por ultimo a discuti e salarionan, unda a tuma den consideracion cu ta trata aki di un compania nobo.
Diabierna mainta pa 11or, a yega na un acuerdo caminda e miembronan di IOWUA a vota na fabor di e CAO nobo. A concretisa esaki na momento cu tanto e team negociador pa FMSA acompaña pa Sr. de Cuba y representatenan di IOWUA a firma e CAO cu tin un valides pa e siguiente 4 añanan. Alexander Hoek, Operation Superintendent di FMSA, John Daal, Aviation Supervisor di FMSA y Gina Maduro HR, Training & Development Manager di RdA, ta forma parti di e team negociador, acompaña pa Sr. de Cuba y representante di IOWUA den persona di Sr. Boy Anthony. Sr. Boy Anthony ta finalisa bisando: “Tabata un placer di por a forma parti di e negociacion cual ta e prome biaha hunto cu e team di RdA. E cooperacion a crea un situacion al estilo win win y por spera un bon relacion di trabou den futuro entre RdA, FMSA y IOWUA”.