SUMATRA, Indonesia – Por lo menos 97 persona a muri den un teremoto potente madruga riba e isla Indones di Sumatra, segun un balance nobo cu e hefe di ehercito riba e region west di e archipielago a indica.
“Te awor aki, 97 persona a fayece y e cantidad ta sigui aumenta,” e responsabel militar Tantang Sulaiman, a declara.
Autoridadnan ainda no conoce e cifra oficial di herido, pero ta papia di decenas atrapa pa e derumbenan, debi cu e temblor di profundad abao a provoca hopi destruccion.
E teremoto di magnitud 6.5 a tuma luga pa 5’or y mey di mainta, ora local, segun Servicio Sismologico Mericano (USGS), 10 kilometer nort di Reuleuet.
Un vocero medico a bisa cu shete mucha a fayece y cu e hospital local ta wordo desborda pa e gran cantidad di herido.
“E hospital aki no por a ingresa e pashentnan, e ora ey nos a manda algun na e districtonan bisiña,” el a bisa.
Hasbi Jaya, cu ta biba den e zona, a bisa cu su famia tabata durmiendo ora cu e teremoto a tuma luga.
“Inmediatamente nos a core sali for di e caso, pero esaki a cay den otro. Tur, for di dak te abao a keda destrosa,” el a conta.
“Mi a wak rond dimi y tur e casnan di mi bisiñanan tambe tabata absolutamente distrui,” el a agrega.
Mas tempran, Apriadi Achmad, director di e unidad local encarga di e gestion di desaster, a bisa cu tabata tin varios persona atrapa den edificionan cu a cay den otro.
“Tin varios tienda y vivienda cu a cay den otro den e districto di Pidie Jaya y e ocupantenan ainda ta atrapa paden,” e funcionario a indica.
“Awo nos ta desplegando mashinnan pisa pa e rescate y nos ta spera cu nos por salba e personanan atrapa,” el a afirma
E trauma di tsunami 2004
Den e zonanan costera, e trauma di e gran tsunami di 2004 a provoca panico.
Den e localidad di Sigli, situa den e costa nort, igual cu e epicentro, hopi habitante a dicidi di laga nan hogar pa refugia leu di lama.
“Nos ta bay na Tijue (3 kilometer leu di Sigli), pasobra nos tin miedo pa haya un tsunami,” Nilawati, un di e habitantenan a declara.
Na Juni, un teremoto di magnitud 6.5 a sacudi west di Sumatra, destruyendo decenas di edificio. Ocho persona a resulta herida.
Indonesia ta riba e “ring of fire di Pacifico”, un alineamento di volcan cu ta reposa riba e limite di plachinan tectonico y fayanan sismico.
Aceh, situa na e puna nort di e isla di Sumatra, a wordo distrui na 2004 pa un teremoto submarino cu a provoca un tsunami gigantesco. El a laga mas di 170 mil morto na Indonesia y decenas di miles na otro paisnan di oceano Indico.
Fuente: RCN Noticias