ALABAMA, Merca- Al menos bintitres persona a muri diadomingo, entre cual varios menor di edad y mas di un docena a resulta herdia pa e tornadonan cu a asota estado di Alabama, sur di Merca. Esaki segun informacion suministra pa e comisario Jay Jones, di e condado di Lee.
“Ta parce como si un hende a coy un cuchiu grandi y corta e tereno den varios pida. Nunca mi a yega di wak un nivel di destruccion asina den mi experiencia den e condado di Lee”, Jones a splica den un conferencia di prensa.
E funcionario a informa cu e saldo mortal a subi na 23, alabes a adverti cu e cifra por sigui subi segun e ekiponan di rescate ta inspecciona awe e zona en busca di superviviente y damnificadonan.
Mayoria di e victimanan tabata den e zonanan rural cerca di e ciudad di Opelika cu ta conta cu 26 mil habitante y ta cerca di e estado di Georgia.
Riba su portal, West Medical Center di Alabama a revela cu el a ricibi al menos 60 herido door di e tornadonan.
Segun Servicio Nacional Meteorologico, un decena de tornado a baha diadomingo atardi na e estadonan di Alabama y Georgia, cu bientonan di entre 215 y 265 km/h.
Di su parti, presidetne di Merca Donald Trump a anuncia cu el a papia “directamente cu e Federal Emergency Management Agency pa duna e gran estado di Alabama un trato fenomenal, na su hendenan maraviyoso cu a wordo destrui pa e tornadonan”.