Caracas, VENEZUELA- Diahuebs anochi y den oranan di marduga di diabierna, tabata tin varios disturbionan den e sector di el Valle, parokia di e capital di Venezuela, cu a laga 12 persona morto. Algun a muri electrocuta, otronan door di heridanan causa door di armanan di candela, segun autoridadnan.
Ministerio Publico a identifica 10 di e 12 fayecidonan, y a añadi cu un di e fayecidonan ta un menor di 17 aña.
Venezuela ta escenario di varios protesta, hopi di nan violento for di comienso di luna ora cu e gobierno di presidente Nicolas Maduro a prohibi e lider di oposicion, Henrique Capriles Radonski pa ocupa cualkier cargo politico den e proximo 15 añanan. Den e protestanan di diaranson por lo menos 3 persona a perde nan bida.
E disturbio y sakeonan ta un desafio pa politiconan di oposicion Venezolano cu ta purbando na canalisa e resentimento contra di e gobierno di Nicolas Maduro, pa un movimento di protestanan pacifico. Miles di persona a uni den e marcha di diaranson y diahuebs, yenando de cayanan di e capital Venezolano como tambe otro ciudadnan di e pais pa exigi pa bin cu eleccion.
Gobierno a responde door di reprimi e protestanan cu balanan di rubber y gasnan lacrimogeno.
Un hospital materno- infantil di Caracas mester a wordo evacua door di e efectonan di e gasnan lacrimogeno. Gobierno di Maduro a bisa cu e forsanan di siguridad tabata respondiendo na un supuesto atake riba e hospital, door di manifestantenan di oposicion.
Fuente: NYTimes