Cuerpo Policial su Flex-Team durante di e siman di dia 22 te cu 28 di october a sigui cu su controlnan regular riba vehiculo como tambe den barionan y cayanan specifico unda cu e rol preventivo di e team aki un biaha mas a resalta.
Flex-Team a patruya den areanan cu tin retonan cu aglomeracion di persona manera Lekker, Manuelito’s. Circle-K, Hotel Baccarat, e casnan di pueblo di Noord, Madiki, Sero Patrishi y Eagle Beach.
Negoshinan manera Lekker, De Olde Molen y Cas Casuela ta wordo controla pa percura pa nan mantene na e orarionan stipula den ley, y cu nan ta cera na tempo y pa no keda clientenan aglomera of para den e parkeerplaats.
Aglomeracion na Eagle Beach:
Na Eagle Beach ta semper controla adicionalmente pa cu tocamento di musica demasiado duro. E parkeerplaats di The Village tambe ta wordo controla pa check pa hobennan cu ta para bebe for di auto, si polis tin cualkier sospecho cu tin algo ilegal tumando luga nan ta listra nan y/of nan auto.
Aglomeracion riba Parkeerplaats di The Village
Tur e gruponan cu den oranan di anochi ta aglomera na altura di Eagle Beach y cu tabata bebiendo alcohol y tocando muziek duro, nan atencion a wordo hala y cori for di e luga. Personanan riba cual tin sospecho a wordo controla. E gruponan diadomingo a keda toca muziek duro te den oranan laat di anochi. Muziek duro ta wordo tolera te cu 11 or di anochi.
Detencion J. violacion articulo 5 di L.W.V.
Diadomingo, 4 di november 2018, mas o menos 1 or y 50 di marduga, durante un control riba L.G. Smith Boulevard na altura di Digicel, ta wak un pick up shinishi marca Toyota coriendo den direccion oost. Un rato despues central ta informa di un pick up lo a dal contra di algun pilar di beton y bicicletanan di huur na altura di e tienda “I love Aruba” riba L.G. Smith Blv. E chauffeur a bay for di e sitio. En conexion cu esaki polisnan a dicidi di bay den direccion Rotonde Las Americas en busca di dicho chauffeur. Na altura di ex .Clinica Carabobo riba L.G. Smith Boulevard, polisnan ta wak un pick up Toyota color shinishi para canto di camidna.E pick up en cuestion no tabata tin bumper dilanti y e tire dilanti tambe tabata plat. Banda di e auto tabata in un persona masculino papiando na telefon. A puntra e persona si e tabata chauffeur di dicho auto, cual el a contesta afirmativo. Na su aliento a bin ripara cu e persona aki tabata bou influencia di alcohol y tambe door di su wowonan cora cu ta basha awa, e no por a para ariba su pianan, tabata papia cu lenga pisa. El a wordo deteni pa a viola articulo 4 lid 2 y articulo 5 di e Landsverordening Wegverkeer.
A bay over na detencion di J., naci na Aruba 1998, como sospechoso di violacion di articulo 4 lid 2 y articulo 5 lid 2 di e Landsverordening Wegverkeer.
Detencion E. pa violacion articulo 5 L.W.V.
Pa mas o menos 4 di november 2018, pa mas o menos 3 or y 50 di marduga, central di polis ta informa cu lo tabata tin un accidente na altura di RBC bank. Polisnan cu tabata cerca a bay atende cu esaki. Na nan yegada nan ta haya un Hyundai shinishi, model Elantra, cu a dal contra di un palo di lus.
E chauffeur tabata hole puro alcohol. E tabata tin wowonan cora cu ta basha awa. Tambe e tabata papia cu lenga pisa y no por a para ariba su pianan.
Door di esey, a lanta e sospecho cu e chauffeur a viola articulo 5 lid 2 di e Landsverordening wegverkeer. Relaciona cu esaki a bay over na detencion di E., naci na Venezuela, 1996.
Control durante actividadnan relaciona cu Halloween
E weekend tabata uno basta druk. Tabata tin varios persona ariba caya relaciona cu fiesta di Halloween. Hopi di e clubnan tabata druk. Olde Molen tabata hopi druk ainda ariba diadoming mainta.
Spotcheck control:
A tene varios control ariba auto y a confisca cantidadnan di marihuana, sakitonan cocaina, piedra, sker, cuchiu, molina di marihuana.
Resumen siman 44 – 2018, periodo 29 october te cu 4 di november 2018.
Total 90 control
Dos detencion pa articulo 5 di L.W.V.