E cantante Colombiano Legarda a muri diahuebs ora cu el a wordo alcansa pa un bala perdi den un intento di robo cu a tuma luga den e bario El Poblado, den e sur di Medellin, segun e agencia EFE a informa.
E Clínica León XIII a confirma den un comunicado cu e artista a drenta cu’n herida “pa arma di candela den craneo na nivel frontal”, pa cual el a ricibi “un diagnostico di un daño celebral hopi severo”, despues di a wordo revisa pa e dokternan.
“El a drenta den un paro cardio-respiratorio. E personal di salud a purba reanima e cantante durante 20 minuut, pero el a fayece”, e centro medico a detaya.
Fabio Andrés Legarda, a nace 29 aña pasa na Popayan, capital di e departamento di Cauca y a emigra cu su famia pa Atlanta, Merca. . El a cuminsa canta cu su 14 aña den e festivalnan Latino y a despues di tabata graba versionnan di cancionnan ariba su canal di Youtube, a firma cu’n cas disquero.
Secretario di siguridad di Medellin, Andrés Tobón, a revela cu Legarda, cantante di reaggueton, tabata den un auto den e sector di El Poblado ora cu e intento di robo na un ciudadano cu tabata forma di un empresa di siguridad, a tuma luga.
E homber “tabata tin su arma reglamentario di candela cun’e y a bringa cu e hombernan cu tabata pretende di comete e robo”, e funcionario a agrega.
Un di supuesto asaltantenan a fayece na e luga, mientras cu e otro a resulta herida y a wordo captura pa polis.
“Di berdad nos ta cansa di e violencia absurdo cu tin na Medellin”, Tobon a bisa.
Legarda, interprete di “La Verdad”, su prome senciyo, a graba cu varios artista di e genero urbano y a comberti su temanan, manera “Libre”, “Necesito tu amor”, “Mala es” y “Hipnotizado” den exitonan grandi.
E artista a gana reconocimento na Colombia cu su aparicion den e “reality show” MasterChef Celebrity, den cual el a cuminsa cu’n relacion cu e Youtuber Colombiano, Luisa Fernanda W.
E morto di Legarda a wordo lamenta pa otro artistanan manera e cantautor Colombiano Fonseca cu a expresa ariba Twitter: “Ta duelmi di tende cu tin balanan perdi ainda den un pais, y cu e caminda ta kita bida di personanan. Esaki no ta husto, Legara. Ni cu bo, ni cu niun otro hende.