LOS ANGELES, Merca- Luis Miguel, e cantante Mexicano conoci como “El Sol de México”, a yega na un acuerdo den un caso hudicial pa un debe di un miyon dollar, cu e mester paga su ex- representante y su abogadonan, segun documentonan legal presenta diaranson na Los Angeles.
E ganado di premio Grammy a pasa un tempo cortico den prizon, dia 2 di Mei, ora cu el a wordo aresta despues cu e no a presenta pa un audiencia den Corte, pero el a wordo laga den libertad condicional, despues di a paga un fiansa.
Un hues federal di Los Angeles a dicidi anteriormente e aña aki, cu un Rolls-Royce di Luis Miguel, di añal 2013 por wordo tuma den beslag pa yuda paga e miyon di dollar cu un hues di New York a otorga na e demandantenan, segun documentonan hudicial.
E decision ta debi na un demanda di violacion di contrat presenta contra di Luis Miguel pa su ex- representante, William Brockhaus, cu ta inclui placa cu e ta debe Brockhaus pa gastonan legal. E caso a wordo transferi despues pa un Corte di California.
Luis Miguel mester a presenta diahuebs den un Corte Federal di Los Angeles, pa un interogacion. Pero den documentonan presenta den tribunal diaransona, ambos partido a bisa di a yega na un acuerdo, pa cual a cancela e audiencia.
E comisario interino Matthew Cordoba a bisa den un yamada telefonico cu e no por confirma di biaha si su agencia ta asumi e custodia di e Rolls Royce di Luis Miguel. E oficina di e comisario a participa anteriormente den e esfuersonan di e demandante pa tuma e vehiculo den beslag.