ARIZONA, Merca – E compañero di formula di Hillary Clinton, Tim Kaine, a primindi diahuebs un “reforma migratorio integral,” papiando na Spaño den un actividad den e fronteriso estado di Arizona y a sigura cu Merca no lo converti den e “nacion di deportacion” cu Donald Trump ta propone.
“Cu tanto den wega pa e comunidad Hispano, ta importante cu nos campaña ta dirigi den un idioma cu ta wordo papia pa asina hopi famia atrabes di e pais,” Kaine a bisa den un Spañp cla, cual el a siña temo cu e tabata traha cu misioneronan Jesuita na Honduras den añanan 70.
Nunca antes, un integrante di un formula presidencial a pronuncia su discurso na Spaño, segun fuentenan di su campaña. E senador ya lo a haci’e den pleno camara na Juni den e debate di un ley migratorio.
“Merca ta un pais miho danki na bosonan. Y Hillary y ami, nos tin un vision positivo pa loke nos kier bay logra,” el a indica, primintiendo “lucha duro” den e prome 100 dianan di Gobierno “pa haya un reforma migratorio integral. Y mientras tanto, nos lo haci tur posibel pa mantene e famianan uni.”
Pa e frontera di Arizona (zuidwest) decenas di miles di persona ta crusa ilegalmente pa Merca tur aña. Solamente na 2015, 64 mil emigrante, incluyendo 8 mil menor di edad, a wordo deteni purbando di drenta e pais via e inhospito desierto di Sonora.
Trump a menasa cu deporta 11 miyon di indocumentado y traha un muraya na e frontera cu Mexico, afirmando cu e Mexicanonan ta criminal y violado. “Donald Trump kier crea un nacion di deportacion (…). Hillary y ami lo bay lucha contra e plan divisivo di Trump cu tur nos forsa,” el a bisa.
Arizona (zuidwest) ta un estado tradicionalmente Republicano, aunke segun Kaine tin chens di ta “disputa” pa e democratanan si nan conta cu e voto di e comunidad Hispano, e mayor minoria di e pais (17% di e poblacion.)
E mesun Clinton a bishita diaranson e Estado aki, unda cu 22% di e votantenan ta Latino. “Si por,” Kaine a ripiti den coso cu e asistentenan di e evento.
Tin 27.3 miyon di Lation registra pa vota na Merca (12% di e electorado) pero solamente 13 miyon lo acudi na e urnanan. Si supera 15 miyon, nan voto lo ta determinante.
“Mi ta haya duele di bisa na e campaña di Trump, cu e Latinonan lo bay tin un voz hopi importante den e eleccion aki. Y e opcion ta bon cla,” el a bisa entre aplauso.
Fuente: NTN24