LONDON, Inglatera – Decenas di bombero tabata necesario pa sofoca un incendio den un edificio di e mercado Londinense di Camden Lock, gran atraccion turistica, e Brigada di Incendio di London a informa.
E bombero a informa cu nan a manda dies vehiculo na e luga y cu nan a caba di paga e candela den menos di 3 ora, sin cu tin victima.
“E ekiponan a traha hunto pa controla e candela y para su propagacion na e edificionan den vecindario,” e vocero di e bomberonan, David Reid, a bisa.
“E prome, di dos y tercer piso, ademas di e dak, di un edificio den e mercado tabata bao di candela,” e brigada a anuncia riba Twitter poco despues di a haya sa di e candela.
Joan Ribes, un testigo di 24 aña, a conta e agencia Britanico Press Association cu e candela a avansa rapidamente.
“E hendenan ta mira, pero nos tin miedo cu lo por tin un explosion den e edificio, ya cu tin hopi restaurant cu cushina,” el a splica. “Nos a yama polis pa nan para e circulacion ya cu berdaderamente e ta peligroso,” el a agrega.
Un vocero di e servicio di ambulance a bisa cu nan a ricibi un yamada pa un incendio pa 12’or y 7 di marduga, ora local.
“Nos no a trata ningun pashent y nos ta sigui na e luga,” nan a informa.
Otro zona di Camden Market a wordo afecta pa un incendio na 2008, cu a obliga pa cera e mercado durante varios luna. Na 2014 otro siniestro a obliganan pa evacua 600 persona.
E mercado, situa den un antiguo parke industrial, ta conoci pa su luganan di artesania, aunke entre e localnan di ropa y di acesorio, tambe tin standnan di buki y di cuminda.
E incendio aki a tuma luga den menos di un una despues di e siniestro cu a kima un edificio di viviendanan social, Grenfell Tower, lagando 80 morto.
Fuente: www.rcn.co