Diamars tabata tin un candela basta grandi na un garashi na Santa Marta. E melding a drenta pa mas o menos 11 or di mainta. Tabata un unidad di ambulance cu a pasa dilanti di e garashi, cu a yama Brandweer di biaha pa asina por despacha e prome unidad di Brandweer.
Sr. Ferdinand Ponson a splica cu na caminda a ripara cu tabata tin hopi huma y manera e prome unidad a yega a cuminsa di biaha pa asina evita cu e candela ta expande pa pafo di e cura. Tabata tin un gran cantidad di auto den e garashi cu tabata na candela y bomberonan a haci un bon trabao pa evita cu e candela expande pa e casnan cerca di e garashi.
Por a nota cu tabata tin varios piesa di auto y tambe hopi auto banda di otro. E candela mes no a cuminsa bou di e garashi, pero mas bien pafo den e cura unda cu e autonan tabata para. Por a scucha explosionnan cual tabata door di tirenan cu ora cu haya temperatura, nan ta rementa.
Den e caso aki, ta di gradici Dios niun di e boternan di CTlane, loke ta wordo uza pa welder, tur tabata poni un otro caminda, unda cu esaki no tabata den cercania di e candela y asina tambe ta evita di tabata tin un candela grandi. Normalmente den un garashi sa tin jugnan di gasolin, cu tambe tabata leu warda. E doño di garashi toch tabata traha na un manera eficiente cu a preveni hopi peliger durante un candela.
Normalmente e boternan aki ta pone den e garashi, pero danki Dios esaki no tabata e caso, Den e garashi tabata tin mas di 5 auto. Si mester remarca cu ora cu e candela a cuminsa, nan mes tabata busca manera di combati candela pa evita cu e expande. Personal di ambulance a pidi e meneer di e garashi pa e haya asistencia medico, cual el a nenga na comienso. Esaki a pone cu e personal di ambulance a pidi asistencia di polis, pa asina forsa e cabayero aki pa tuma asistencia medico, door cu e la inhala hopi huma.
Origen di e candela no ta conoci y esey ta bou di investigacion, segun Sr. Ferdinand Ponson, vocero di Cuerpo di Bombero