Relaciona cu e candela feroz diadomingo pasa di 11 or anochi na Amuse Sunset restaurant situa na Bucutiweg ta bou investigacion. E candela aki sigur a cuminsa mas trempan ora cu autoridad a keda raporta door di habitantenan y hasta personal di brandweer cu a mira e candela aki for di airport. E candela feroz a kima tur cos cu tabata tin na e restaurant. Unidad di brandweer a yega basta lihe y cuminsa combati e candela mientras mas truck a yega pa duna un man. Te hasta boto cu tabata mara na e pier pega cu e restaurant a kima. Te banda di 3 or marduga nan a termina cu e trabounan completo.
Dialuna mainta departamento tecnico di Cuerpo Policial, OVD di brandweer hunto cu esnan di prevencion y e comandante a presenta pa haci nan investigacion y saca potret di evidencia. No por menciona mucho kico tabata causa di e candela pa no stroba e investigacion y tambe parti di seguro y mucho mas. Pero autoridad a haci nan investigacion y tur cos ta den man di seguro y autoridad.