Diaranson anochi pa mas o menos 8 or di anochi, Bario di Simeon Antonio a tuma nota di huma y un candela grandi cu tabata tin ariba tereno di dump.
Na yega di personal di siguridad di Serlimar, a tuma nota cu e sushi hopi cerca di e trucknan y materialnan pisa di palo, cu Serlimar ta trahando cun’e tur dia. Personal di masnoticia a saca algun potret y a nota cu ta trata aki di un candela hopi grandi y cu e tabata sacando hopi huma.
Pa basta dia caba por a nota cu tin huma ta saliendo for di e dump, pero diaranson anochi esaki a bira un candela hopi grandi. No ta conoci ainda si ta un candela intencionalmente cendi of ta e mesun sushi ariba tereno di dump ta ocasiona e candela aki.
Di parti di Cuerpo di Bombero, a compronde cu nan no ta duna asistencia mas na e tipo di candelanan aki, ya cu nan materialnan ta keda daña ora cu nan subi tereno di dump. Serlimar lo mester tuma accion nan mes, pa combati e candelanan aki. No ta conoci si nan lo tuma accion awe nochi ainda, of si esaki lo tuma luga den oranan di mainta.
Masnoticia lo sigui e desaroyonan aki di cerca.