CARACAS, Venezuela- Gobierno di Venezuela diabierna a denuncia un atake terorista contra di un deposito di e Instituto Venezolano di Seguro Social (IVSS) ubica den e localidad di Guarenas, unda cu tabata tin materialnan di hospital warda.
E vice-presidente sectorial pa Socialismo Social y Territorial di Venezuela, Aristóbulo Istúriz, a splica cu ta trata di un candela cu, segun informacion, tabata intencional.
E candela a afecta 22 mil m², unda tabata tin 6 warehouse, dos di cual a bay perdi totalmente. “Esaki tabata un acto di barbarie contra di e pueblo. E ta e acto criminal contra di salud mas grandi den historia di Venezuela”, el a menciona.
Segun Isturiz, e atake a tuma luga diahuebs, “na e mesun hora cu e mandatario, Nicolas Maduro, tabata wordo huramenta como presidente”, pa un periodo constitucional nobo.
Material pa tres centro nobo
Den e warehouse tabata tin material pa ekipa tres centro di salud nobo den e pais, incluyendo tratamento y unidadnan di dialisis, suficiente pa atende rond di 10 pashent cu ta sufri di malesa di riñon, 16 mashin di X- X-ray, 14 mashin di anestesia, 54 sistema di ventilacion, tomografia y unidadnan di resucitacion pa babynan recien naci, e.o.
Un hospital ambulante cu sala di operacion y terapia intensivo tambe a bay perdi den e candela, segun Isturiz.
segun e funcionario, a uza 4 miyon liter di awa pa paga e candela, den labornan cu a extende te den oranan laat di diahuebs atardi.