Varios pais di Sur America ta enfrenta un ola di calor extremo, cu temperatura cu ta pasa 40 grado Celsius. Zomer den e region austral a bira mas cayente cu lo normal p’e fenomeno climatico natural di El Niño y ta bira pio door di e keintamento global.
Na Chile, e candelanan forestal registra na Valparaiso desde diabierna a propaga rapidamente debi n’e temperaturanan halto y e mortonan causa p’e tragedia ya a pasa 122.
Debi n’e crisis, e gobierno di Gabriel Boric a dicta un toke de queda pa evita sakeo y otro medida economico y tributario pa resolve e emergencia. Fuera di esey, e forsanan di siguridad ta busca e supuesto responsabelnan di a provoca e prome candelanan.
Segun hefe di Defensa Nacional na Valparaiso, e contraalmirante Daniel Muñoz a afirma n’e medio ADN, tin indicacion cu tabatin algo “planifica” y “organisa” den e origen di e tragedia, iniciando na momento cu e thermometernan a marca cifra cerca di 40 grado Celsius den e zona central di e pais.
Calor extremo
Argentina tambe a pasa varios dia di calor extremo, cu temperatura di 39 grado Celsius den e ciudad di Buenos Aires y cerca y hasta di 41 grado Celsius den algun localidad manera Las Lomitas, provincia di Formosa. P’e alto consumo, e sistema di energia di coriente a collapse y tabatin blackout den varios region di e teritorio.
Segun e Servicio Meteorologico (SMN) a informa, siman pasa algun localidad Argentino a yega n’e olanan di calor mas extenso di nan registro. E alivio ta yega dialuna anochi pa varios zona, despues di tormenta y biento fuerte, e organismo a indica ora cu a emiti un alerta geel.
Paraguay a registra durante fin di siman temperatura maximo extremo, cu a yega 42 grado Celsius den e localidad di Pozo Colorado y a supera e marcanan historico den shete districto, di acuerdo na un rapport di e Direccion di Meteorologia y Hidrologia di e pais.
E clima calor lo keda durante fin di siman cu algun awasero di duracion cortico.
Na Uruguay, e ola di calor a cuminsa dialuna, e Instituto Uruguayo di Meteorologia (Inumet) a informa, cu a pronostica “un masa di aire hopi cayente” cu “ta afecta e pais, generando temperatura halto cu sensacion termico halto.”
“E temperaturanan extremo minimo lo ta mescos of mas halto cu 21/24 grado Celsius y e maximonan mescos of mas hopi cu 36/41 grado Celsius y puntualmente mas halto den e parti west y nort,” e organismo a anticipa.
E mesun masa di aire cayente cu ta afecta Uruguay y Argentina ta hisa e temperaturanan den e parti zuid di Brasil, mas precisamente den e estado di Rio Grande do Sul. E calor extremo di siman pasa a baha un poco dialuna door di e entrada di un cold front for di e costa Atlantico, pero diadomingo tabata e di dos dia consecutivo cu e maximonan oficial den e estado a acerca 40 grado Celsius den e ciudadnan mas west di e districto.
Hunto cu e clima sofocante, a registra un aumento di nubia y awasero den varios region, e empresa di meteorologia Metsul, a indica.
Mas den nort, e ciudad di Rio de Janeiro ta enfrenta un epidemia di dengue cu a bati e record historico di hende infecta. Na januari di e aña aki, Rio a registra cerca di 10 mil caso di e malesa, loke ta representa casi e mita di e 22.959 notifica den 2023. E Departamento di Salud ta atribui tal indice n’e aumento di temperatura y e awasero continuo. “Cu e calor, e sangura (Aedes aegypti, cu ta transmiti e malesa) ta nace hopi mas lihe y e temporada di awasero ta provoca e acumulacion di awa y mas criadero di desaroyo di sangura,” e secretario municipal di Salud, Daniel Soranz, a splica.
