Un candela feroz a kima varios cas diabierna marduga den e bario Ramírez, situa den e localidad di Santa Fe, oost di Bogotá, Colombia.
E vlamnan a destrui minimo 70 cas den e zona, unda principalmente e residentenan di reciclahe ta biba den condicion precario, segun Blu Radio. Despues di e suceso, e ekiponan di rescate a evacua mas di 200 persona for di e area afecta.
Aunke e autoridadnan no a confirma causa di e candela, ta specula cu esaki por a wordo provoca p’e explosion di un cilinder di gas.
“Nos a tende un zonido masha fuerte, manera un cilinder di gas. Na momento cu esaki a explota, hende a cuminsa evacua pasobra despues di esaki nos a tende manera dos of tres explosion mas”, Stephanie Cruz, un di e afectadonan, a relata n’e medio menciona.
Alcaldia di Bogotá, cita pa El Espectador, a informa cu “a tuma luga un atake directo y un buskeda primario, sin haya hende herida”.
A activa e sosten di Polis Nacional, e Instituto di Districto pa Maneho di Riesgo y Cambio di clima (IDIGER) y e secretaria di Integracion Social.
Cuerpo di Bombero di Bogotá a anuncia cu pa 7’or di mainta [ora local] e candela a keda controla. Den e trabaonan a participa miembro di minimo tres stacion: Centro Historico, Restrepo y Sentral.
A indica cu e candela a afecta “varios cas di construccion precario” y, manera ya a menciona prome e Alcaldia, “no a raporta hende herida”.