Fundacion contra Cancer di Prostaat ta un fundacion cu a wordo lanta desde 2012 caba door di sr. Rudy Rodriguez, q.e.p.d., kende tabata un pashent di cancer di prostaat y hunto cu algun otro miembro a lanta e fundacion, pa tin un plataforma na Aruba pa concientisa hende homber riba e malesa di cancer di prostaat y ta haya cu awor cu ta e luna di November, cu ta luna di concientisa mundialmente riba malesanan cu tin di haber cu sernan masculino, cu e luna aki kier a traha riba informa kico mas ta haci como fundacion y tambe duna e comunidad oportunidad cera conoci cu e fundacion y saca materialnan di promocion cu ta trahando riba dje, segun Jurgen Benschop.
Rudy Rodriguez a fayece na 2014 y prome cu el a bay, el a laga e lema “Ami tabata laat, abo no mester ta laat”. Esey ta nifica cu si bo ta na tempo y haci bo testnan na tempo, tur hende por sobrevivi cu e malesa di cancer di prostaat. Na Aruba ainda cancer di prostaat ta wordo considera como taboo, hopi hende homber no gusta papia di dje. Tin cu bisa cu den e fundacion tin varios pashent cu a deal cu e malesa di cancer di prostaat y te awe ainda ta bezig ta deal cun’e. Pero ta importante pa papia riba dje y concientisa nos comunidad kico e ta, kico ta e sintomanan y tambe kico ta testnan cu por wordo haci. Pakico e ta un taboo y hende homber no kier papia di dje, tur hende homber ta kere cu e unico test ta e touche test, of e test di dede. Siendo cu via dokter por haci un test di sanger, caminda cu e por midi y duna indicacion cu tin algo fout cu e prostaat. No necesariamente tin cancer di prostaat, pero ta duna indicacion cu e ta molestia. Por tin prostaat hincha, bo por tin un infeccion, pero en todo caso ta importante pa cuminsa test na tempo.
Ta wordo bisa cu hende homber riba 50 aña of si tin 40 aña y tin indicacion cu tin cancer na prostaat of otro tipo di cancer den famia, ta bon pa cuminsa haci e testnan tempran. Como fundacion ta traha hopi di cerca cu Koningin Wilhelmina Kankerfonds of otro fundacionnan, cu ta mas dirigi riba sernan femenino manera BOB y Mary Joan Foundation y ta haya e ora cu falta ainda na Aruba un plataforma pa papia riba hende homber. Entre otro malesanan di hende homber. Esey ta trece cun’e cu kier duna informacion kico bo por haci y con bo por contact e fundacion si tin pregunta y si kier papia mas di e malesa.
Hopi biaha, bo no ta sinti dolor. Mayoria biaha ora bo sinti dolor, bo ta un fase hopi laat caba. Tin miembronan den directiva cu a pasa door di full e proceso di bay afo, haci nan tratamento y te awe ainda ta biba sin a sinti un dia dolor.
Importante ta kico ta e sintomanan cu bo ta cuminsa sinti, bay na bo dokter di cas pa haci e testnan necesario.
Benshop a agrega cu e fundacion kier yuda traha riba un comunidad sostenibel. Benschop mes ta puntra kico ta su link cu e malesa, cual el a contesta cu el a biba e malesa mes cu su difunto tata y el a priminti pa yuda concientisa e comunidad di Aruba na un edad hopi hoben pa haci tur hende homber na Aruba y rond mundo conciente di kico ta e malesa y con bo por traha pa previni’e. Esey ta trece cune cu na un edad relativamente hoben a dicidi pa join e organisacion, a papia cu Rudy Rodriguez prome cu el a fayece. A drenta e organisacion y nan a dun’e e confiansa e ora pa sigui lidera e fundacion desde 2014.
E fundacion tin un website nobo cu yama www.prostaataruba.com. Tin tambe nan pagina di Facebook cu ta Fundacion Contra Cancer di prostaat y tambe nan email adress cu ta [email protected]. Si tin cualkier persona cu tin pregunta of kier haya mas informacion riba e fundacion of riba e malesa, no duda den tuma contacto e ora e secretario lo tuma contacto pa un cita of un di e miembronan lo tuma contacto pa duna mas informacion.