Durante un anochi di informacion ofreci pa Departamento di Enseñansa y Ministerio di Enseñansa, studiantenan preparando pa sigui nan estudio afo a haya tur informacion necesario pa por tuma e decision final di e pais cu nan lo kier haci esaki.
“Nos a tene un anochi di informacion riba estudio na Canada”, asina Minister di Enseñansa, Michelle Hooyboer-Winklaar a bisa. Esaki ta un actividad cu nan ta tin pa e ultimo tres añanan unda ta duna informacion mas detaya riba opcion di studia na Merca of Canada… “y awe nochi nos a pone enfasis riba Canada.”
E evento aki a wordo teni un par di biaha caba dunando informacion riba estudio na Merca… “pero tin hopi interes y nos ta haya hopi pregunta riba e posibilidadnan di bay Canada,” e mandatario a agrega.
“Nos a organisa e anochi aki cu informacion cu nos a ricibi for di consulado di Canada na Caracas. Nan mes no por ta presente pero tur e informacion cu nos a haya nos a comparti cu nan y banda di esey informacion cu nos mes tin, cu acuerdonan cu nos tin cu diferente institutonan di Canada. Nos a duna informacion global riba e aspecto di studia na Canada pa asina duna mas informacion posibel pa studiantenan y nan mayornan por scoge,” el a agrega.
“E pregunta esencial ta: ki tipo di estudio lo mi kier sigui? Ki programa? Na cua college of universidad mi ta wak mi mes den dje? Tin hopi puntonan cu lo mester considera, hopi informacion cu mester revisa y haci investigacion pero nos ta convenci cu treciendo mas informacion posibel na un manera consistente y accesibel e studiantenan lo por tuma decision hopi mas a base di e informacionnan disponibel. E por pas den nan metanan y aspiracionnan pa futuro,” e Minister a amplia.
Canada ta un opcion hopi factibel mirando cu tin asina hopi diferente scolnan disponibel cu ta hopi contento pa ricibi studiantenan di Aruba y di otro banda e ta pagabel. Compara cu hopi otro caminda cu por manda studiantenan Canada su prijs ta un tiki mas abao cu, por ehempel, Merca y esey ta haci’e un opcion atractivo.
“Nos tin acuerdonan cu diferente scolnan y esey atrobe ta pone varios opcion riba mesa pa un studiante scoge. Nos tin awe nochi un skype session cu un studiante cu ta eynan awor y nos ta wak cu interes ta creciendo,” Michelle Hooyboer-Winklaar a bisa.
Studiante Lisandra Thiel, cabando su EPI sector Administracion di Turismo, a splica cu for di ‘vierde’ ya caba a cuminsa bisa nan pa cuminsa evalua nan opcionnan pa sigui studia. “For di un comienso mi kier a bay Canada pero no tabatin hopi informacion,” e ta expresa. E la sigui bisa cu e ta hopi contento cu a cera acuerdo cu Canada asina brindando e e oportunidad di sigui su soño. “E informacion ta basta extensivo y mi tabata sorprendi cu nan a cubri Seneca College na Toronto den college fair y awor mi sa mas ainda. E skype session cu e studiante na Canada tabata hopi informativo y mi ta bay p’e,” el a laga sa.
Jeandre Jacopucci, a bisa cu e ta scogiendo Canada pasobra el a bay college fair unda e la haya contacto cu Centennial College mi a hay’e hopi bon y dicidi di bishita e website y haya e programa cu e kier bay. Jeandre ta interesa di sigui su estudio como Architectural Technician.
“Estudio ta mas barata y por traha durante cu ta studia den e sistema di coop. Despues por keda tres aña y eherce loke mi a studia,” e ta elabora.
Sidney Simmons cu actualmente ta den e programa di Universidad di Aruba Academic Foundation Year a bisa cu e ta un tradicion pa kies pa bay Hulanda. Hopi ta haya Europa atractivo pa conoce pero e ta haya cu lo ta hopi bon pa conoce otro partinan di mundo cu no ta conoci ainda. Esaki combina cu e calidad halto reconoci ta loke tin’e convenci. Sidney no a scoge loke e kier studia ainda pero e ta mira varios opcion di cual e por kies.
