MIDLAND, Texas – Geologonan ta bisa cu un estudio nobo ta mustra cu un campo di petroleo west di Texas ta haci e otro camponan te awor aki haya na Merca masha chikito, segun Servicio Geologico di Merca.
Ta calcula cu e cuenca di Midland di e zona di Shale Wolfcamp den espacio di Permiano tin 20 mil miyon di bari di petroleo y 1.6 miyon di bari di gas natural, segun un evaluacion nobo di USGS.
Esaki ta haci’e tres biaha mas grandi cu e evaluacion di petroleo den e formacion gigantesco di Bakken na North Dakota.
E calculacin aki lo haci e campo di petroleo, cu ta abarca e ciudadnan di Lubbock y Midland – mas of menos 189 miya di distancia – e mayor descubrimento di “petroleo continuo” na Merca, segun USGS.
“Desde hopi tempo sa cu petroleo tabata eynan. Nos labor ta pa calcula e volumen di petroleo recuperabel,” Chris Schenk, miembro di e ekipo di evaluacion a bisa KWES, afilia na CNN.
E termino “petroleo continuo” ta referi na e formacionnan no convencional manera eskisito, unda cu petroleo por wordo haya atrabes di henter e formacion y no den piscinanan separa. USGS ta encarga pa calcula cuanto petroleo ta wordo considera no descubri, pero tecnicamente recuperabel.
“Incluso den areanan caminda cu a produci miyones di miyones di bari di petroleo, ainda tin potencial di haya hopi mas,” Walter Guidroz, coordinador di e Programa di Recursonan di Energia di USGS a bisa den un comunicado.
“E cambionan den tecnologia y practicanan di e industria por tin efectonan significativo den e recursonan cu ta tecnicamente recuperabel y pesey nos ta continua haci evaluacionnan di recurso na Merca y na mundo,” el a añadi.
Desde 1980 a produco petroleo den e area di Wolfcamp den posnan vertical tradicional, pero awo e compainanan ta uzando e tecnica di perforacion horizontal y fracturamento hidraulico “fracking” pa probecha e reservanan di petroleo continuo. Mas di 3000 pos horizontal ta wordo opera den actualidad, segun USGS.
Morris Burns, ex presidente di Permian Basin Petroleum Association, a bisa e cadena KWES cu e prijsnan abao di petroleo – e bari ta actualmente na 46 dollar – ta nifica cu e petroleo lo keda bao di tera den e futuro previsibel.
“Nos ta eligi algun plataforma di perforacion de bes en cuando, pero nos no lo bay wak despega realmente te cu nos tin e prijs den e cuadro di 60 pa 65 dollar,” Burns a bisa na e stacion.
“Ora nos ta papia di e cantidad di miyones di bari di petroleo subteraneo no ta nifica cu nos por recupera tur,” Burns a bisa.
Primavera ultimo CNN a reporta cu “fracking” ta representa mas di mita di tur e produccion di petroleo na Merca. Den aña 2000 solamente tabata tin 23 mil pos di “fracking” ta pump cerca di 102 mil bari di petroleo pa dia. Na Maart ultimo ya taata tin 300 mil pos di “fracking” produciendo 4.3 miyon di bari diario.
E produccion di fracking, lidera pa Permian Basin, Bakken Formation y Eagle Ford, tambe na Texas, a causa cu e prijsnan di petroleo a cay, haciendo cu e cifra historico di 100 dollar a cay te cu 25 dollar pa bari na principio di e aña aki.
Fuente: CNN en Español